Manà fora su Trentino Tv l program l vegn endrezà dal Comun General de Fascia

“Pedies”: en sabeda ai 06 de dezember vegn fora la puntata #515 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 515. I argomenc che vegn portà dant te la puntata de chesta setemèna l é:
Rua Sèn Nicolò con agnoi e diaoi. Anter tema per i diaoi e legreza per i dons, i bec i vif chest moment particolèr con gran sentiment e marevea ence amò anchecondì. Con vèlch rima e recorc da zacan conté da Giacomo Cincelli e Renato Soraruf conton de coche se speta l Sènt più benvolù de dut l an e de vèlch aspet che l é mudà tel temp.
La Radunanza Generèla de la “Majon di Fascegn” che chest an la rua al cedean di 50 egn. Très n filmat l é stat recordà la desvaliva scomenzadives metudes a jir fora per l an: Jandeluvio al Carnascèr Fascian, l seminarie sul Ladin Dolomitan, scontrèdes con autra mendranzes da duta la Tèlia e sessaben l lurier de la pèrt linguistica. Apede a la ativitèdes e ai projec, l é stat recordà e premià i presidenc, i colaboradores e i conseieres da dant con n don de recognoscenza. L é stat recordà ence l ex diretor Fabio Chiocchetti con n gran detelpai enceben che no l era prejent. La rejons é states portèdes dant te na letra leta ju da la ex presidenta Mirella Florian.
La Radunanza anuèla de l’APT de Fascia olache col bilanz, l President Fausto Lorenz e l diretor Nicolò Weiss te si referac i à portà dant argomenc e costion per capir olache sion e olache volon jir anter strategies e obietives neves. Te la Radunanza l é stat recordà i bogn ejic de la sajon passèda e coche Fascia se enjigna al invern che vegn de gra ence a impianc e investimenc neves ouc a ge sporjer ai ghesć na perferida moderna e de bon livel per restèr sempetr al pas coi tempes.
N spetacol teatrèl per contèr de la Opzions che del 1938 à tocià la jent de lengaz todesch e ladin de noscia Region: na piata foscia de la storia de la valèdes ladines, ma con valores universèi e de valuta atuèi. Chest en curt l segnificat che la doi atores, Stefania Bogo e Francesca Satta Flores, les à volù portèr sun paladina con na raprejentazion leèda al liber de Luciana Palla dal titol “Opzioni Guerra e resistenza nelle valli ladine”. Chest spetacol l é stat portà dant te duta la valèdes ladines e a Cianacei l é stat en mercol ai 19 de november.