Eburnea – l é l titol de la mostra che chisc dis se pel veder a Moena aló da la galaria de èrt contemporana de Ufofabrik de Mauro Defrancesco. Se trata del percors artistich nef del artist Claus Soraperra de la Zoch da Cianacei. Eburnea col segnificat de lumenous, de bianch desche la neif, met al zenter la pèrt chièra del chèder che no la é neutra, ma la chief per l lejer. N viac del artist envers la spiritualità e la natura, co la doura de materièi che muda, desche la bèrba de pec, per na teila viva, a chela che ge serf temp. Tel temp, disc l artist, dut muda e belimpont chest mudèr l é leà col lurier che met ensema spazie e temp.
I Gnoches l é n bèst umol e da zacan, che vegn ca da la tradizion de la Èlpes e de la Baviera. Chesta speisa contra l sfrealaus la struta su l pan veie che concià ite con etres vanzumes e saores l pel doventèr zeche da bon. Zacan l era n piat soraldut per bachegn, che didèa tegnir permez. Per fèr cercèr chesta speisa, la Musega da Vich, coi volontadives, l’à endrezà na festa olache l é stat enjignà passa doimile gnoches belebon aprijié da la jent che, anter l auter, l à ence abù l met de poder emparèr ai fèr. Na festa dret garatèda olache, l é stat dit, no l era demò na costion de rezeta, se à volù ence portèr dant n scrign de valores, saores e memoria da respetèr e da ge passèr a la neva generazions.
Te la rubrica de aprofondiment “Zebicher, per veder più davejin”; Ve conton del Lech de Soraga e de si ucie. Chest lech artifizièl, che l é stat fat sù amò di egn ’50 col obietif de fèr corente, l é doventà col temp n habitat ideèl: n post segur olache se à logà ju ucie neves da foradecà e n pont de referiment per sacotenc ucie migratores che i se bina belimpont chiò d’aisciuda e d’uton. Col didament del espert Gilberto Volcan, porton dant curiositèdes de chest sit e la sorts de ucie che belimpont chiò apede l’èga i à troà so habitat che carenea con so stil de vita e che l ge arsegurea de troèr da magnèr. N lech artifizièl nasciù per i besegnes del om ma che tel temp l é doventà ence n sit de valuta straordenèra dal pont de veduda naturèl e ambientèl.
I reports de chesta setemèna i é stac enjigné e porté dant da Riccardo Zanoner, Doris Valentini e Angela Pederiva.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
