Dai 25 de setember ai 3 de otober ence te Fascia l é stat endrezà evenc e manifestazions tel cheder de la 12° edizion de la setemèna del azet. L tem chesta outa l é stat la segureza a 360°: dal pont de veduda de la strèda, con na raida co la roda ensema coi Polins de Fascia che à despiegà la regoles da respetèr su la stèda de la rodes, dal pont de veduda dei joegn, con na scontrèda dedichèda a la creazion de na comunanza de sentadins responsaboi, e da n pont de veduda più personèl con na scontrèda olache à tout pèrt n psicologh e n maester de 2° dan de Yoseikan Budo te chela che l é vegnù fora che la persones les se sent malsegures tant te majon, coi dac che moscia che te un an l é stat portà dant adertura 635 denunzies per violenza, che ence canche les cogn jir stroz, per lurier o per rejons personèles, da soules, e che à portà a pissèr de meter a jir n cors per duc de defendura personèla e per emparèr a ge front e a schivèr situazions de pericol.
Ti ultimes egn l’APT de Fascia l’à envestì n muie te la comunicazion e i resultac i ge dèsc rejon ajache l numer di turisć l se smaorà debel ence a livel internazional. Apede, n aspet che à didà l é stat l recognosciment da pèrt del UNESCO che però l perveit de mantegnir cerc standard leé al teritorie e al ambient. Per l davegnir donca sarà debesegn tor dezijions emportantes per vardèr inant e arsegurèr a chi che vegn en feries de poder se goder n ambient più natural che l é meso.
L legnam te nosc raion l é na ressorsa de gran valuta sibie desche materièl per cèses e tobié sibie ence a livel comerzièl e economich. L é con chest argoment che l Istitut Ladin „Majon di Fascegn“ l à prejentà n liber nef dal titol ”Catene di valore” curà da la studiousa da Neva Karin Pattis. Chiò vegn tout en conscidrazion soraldut i egn entorn l 1500 canche se aea svelupà n cert enteres economich dintornvia l legnam che aea tout ite Neva, Fascia e Dier e si raporc con Unejia che belimpont de chi egn la era do a doventèr na potenza economica e militèra.
Ta Penia l é l’ultima Sia dita a la “Veneziana” amò en funzion te Fascia. Chesta sort de sies che les va co la forza de l’ega, les se à svelupà dal 1500 en cà e l inom “Veneziana” l vegn cà dal fat che l model tecnologich de referiment l vegnia belimpont da Unejia. La gran neva l era che da la bores se podea taèr fora brees e pianices te pech temp e zenza fèr massa fadia. Raimondo Soraruf anchecondì segat, l moscia e l spiega ai spetadores de Pedies si mecanismes e so funzionament.
I reports de chesta setemèna i é stac enjigné e porté dant da Doris Valentini e Riccardo Zanoner.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN - vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
