A groasa liabekait ont ear ver de gònze gamoa’schòft; s hom toalganommen en mol de derstelltn van lokal vraischòftn, de kinder va de earste schual van òllgamoa’schual Pergine 1 ont an ettlena jungen toalnemmer van Gamoa’rot van kinder aa. Asn palko hom se ogabèckslt de autoritetn ont hom trong de sai’ kuntschòft de gabinger, as hom de sai’na familie glaim gahòt: de Serena Pergher, as hòt 22 jor as de 26 van hourneng, Gs Fiamme Oro, as hòt kriak der bichte viarte olimpische plòtz en de vinfhundert baibermetre Speed Skating - gahasse aislaf asn ais ont der Michele Malfatti, as hòt 31 jor, Gs Fiamme Gialle, as hòt kriak de goltmedailen en de spezialitet van nolaven en mònnschòft (Team Pursuit 3200 metre).
Der Michele Malfatti hòt gadenkt de sèlln verzauberte momentn: “Ka Pechino sai ber de vouderleistn gaben, ber hom praucht jarder va òrbet ont technische verpessern: sechen se der entram van an iatn atlet as boret kimmp ist an groasn vrait ont men ist zavrin”.
“I hon nèt kummern ont leider, i hon òlls gem ont i hon mer nèt gabòrtn der viarte plòtz ver drai cent van bronz. S lem van an atlet ist schea’, ober men miast vil opfer mòchen. Sechen de familia ont de kamaròttn as tifarn ver mi hòt mer gem vil kròft ont an schupf va mear”, hòt se tsòk de Serena Pergher.
Der pirgermoaster Fontanari hòt augatu’ s mol pet en unterstraichen de groas kreft ont opfer as de atletn hom gatu’ ver za hom de doin gabing. “Hait tea ber nèt lai vaiern de sportivgabing ober de identitet van a gamoa’schòft as guat ist za bècksln de aigene gabing en an zòmmear. En de inser kloa’ gamoa’schòft mu’ augea eppes va groases. Der doi prais ist an simbolische druck va de inser gamoa’schòft”.
De Paola Mora hòt gadenkt as de zboa gabinger kemmen va Mala van Oachpèrg:”A gabing va Guinness. Hintn en òll atlet hòts a familia as geat en no, s hòt trainer as sai’ vroa gaben ver de earstn prais ont hom en gamòcht gearn hom der sport, s hòt sportvraischòftn ont gamoa’schòftn as hom sa u’ganommen. Der Trentin hòt gabungen en de Olimpiadi gèltsgott en de zòmmhilf van vraibellega ont va de sportivorganizazion”.
“De Olimpiadi sai’ an ausònder sporttrèff, der meareste tsechen en de gònze bèlt, s ist gaben a schea’na postkòrt ver de inser lòntschòft. Vil de vraibellega as no stea’ en de jungen as derno kemmen gabinger. I padonk sa ont padonk me pet en president Fugatti ont pet òlla de sèlln as hom gabellt trong de Olimpiadi en Trentin, de lait as hom organisiart, der Coni, der Olimpischekomitat. Ber bòrtn iaz der bichte moment van Paralimpiadi”, hòt er tsòk der Soini.
Paolo Bouquet hòt unterstraicht as gabingen a medaia ist an groasn ear ver an atlet ober aa a groasa responsabilitat: “ver za abibarn en sèlla riven s prauchen jarder va òrbet ober aa gèltzuazoln ver internazionaln sportivinnrichtn as sai’ an socialpahalter ver de gamoa’schòftn. Ber miasn nèt vergèssn aa as der sport ist technologi ont untersuach aa”.
Letrattdinst ont filmat gamòcht van druckdinst
Download pilder ont interviste do
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
