La neves les perveit:
- Cors de atività motoria metù a jir tras chatbot: l é stat metù ite n percors video de ejercizies fisics, metù ju aldò del trimeter de gravidanza. L materièl, lurà fora co la colaborazion de la mamanes, de la ginecologhes, de la chinesiologhes e fisiatres, l é stat validà da la Unità Operativa de Reabilitazion de l’APSS. Vegn spezificà che, a la femenes, a cheles che ge stèsc do i ambulatories de medejina “materno-fetale” per risech aut o che à fatores de risech spezifics, ge vegn racomanà de fèr na vijita dal profescionist de referiment dant de scomenzèr via l’atività.
- Cors de microlearning su l’alimentazion: l’App la vegnarà integrèda con n curt cors de formazion, dat fora tras chatbot e che rejona de alimentazion canche na femena speta. Chest modul didatich perveit video de dotrei menuc con spiegazions e do quiz de verifica. Al contegnù ge stèsc do mamanes, ginecologhes e nutrizionisć e l é stat validà dal Servije de Dietetica e Nutrizion Clinica de l’APSS.
- Canal News: l é stat implementà n nef canal de comunicazion, con azes diret da la piata prinzipala del l’App. Chest strument l darà l met de meter en consaputa per temp la utentes dintornvia la neves de TreC Mamma e ence i profescionisć sanitères i podarà l duèr per meter en consaputa en cont de corsc dant l nasciment, de scontrèdes spezifiches o de evenc de enteres per la femenes e sia familia.
La femenes che doura jà l’App les cogn demò l’agiornèr. Chi che no à amò desciarià l’app, troarà jà la neves a la leta jà col prum azes do da la instalazion.
L’ultima neva la revèrda l chestionèr de aprijiament anonim che la mères les troarà su la home page de TreC Mamma. Scriver ite chest chestionèr, per chel che se ge met presciapech 10 menuc, l é dassen emportant per binèr su la consciderazions de la utentes dintornvia l’App e sia funzions, e darà l met de valutèr co jir inant. L chestionèr se podarà l fèr scin ai 30 de setember del 2025.
Chisc agiornamenc i raprejtea n vèrech inant tel sporjer servijes digitèi dediché a la sanità de la mère e del fantolin tel Trentin, renforzan l empegn de APSS co la colaborazion de TS4.0 tel sporjer servijes più percacenc e sorii.
L’App TreC Mamma
A la leta dai 8 de aost del 2023, TreC Mamma la se à tout fora de anter per sia capazità de ge responer ai besegnes de la femenes che les é autramenter con n orientament multidisciplinèr. I dac de azes de ogne dì l é na desmostrazion de l’aprijiament da man di utenc: ogne dì passa 550 femenes les doura l’aplicazion per verifichèr l’agenda di apuntamenc de control e la informazions sun coche cresc l pop e i mudamenc che revèrda sie svilup.
Dac de doura tel detai:
- anchecondì passa 4.804 femenes trentines che à na media de 32 egn à desćiarià l’App, l 12,5% l é femenes forestes.
- L 56% de la femenes speta l prum piciol, l 31% l secondo e l 12,5% speta l terzo o più.
- L’App la vegn desćiarièda più che auter per talian (99.5%), ma la é a la leta ence per ingleis e per franzous.
- En media l’app la vegn desćiarièda da la eles a la 13a setemèna de gravidanza.
- I contegnui informatives de l’App i é stac visualisé 14.000 outes ti ultimes 6 meisc, 28.783 tel ultim an e più che 43.000 outes da canche, acà 2 egn, la é stata metuda a la leta.
Anter i aprofondimenc più visualisé l é chi che vèrda i controi endèna la gravidanza, i sintomes per chi che ge vel fèr sobito n control e i sintomes de la gravidanza che vegn fora più da spes ma ence la informazions sul prum trimester.
L’app, estra che la novitèdes tanche despieghèdes, la sporc sacotenc servijes e funzionalidèdes, desche:
- Visualisazion apuntamenc CUP: la informazions personèles de la eles metudes ite co l’autenticazion, les é coleèdes al sistem informatif de l’Apss e les dèsc l met de veder duc i apuntamenc de follow-up programé tras l CUP (sistem unich de prenotazion) de l’Azienda sanitèra.
- Monitoraje de la gravidanza: n calandèr che ge va do, de setemèna en setemèna, al svilup del bez e ai mudamenc de la mères, col sporjer consees spezifics per ogne fasa.
- Contegnui zertifiché: azes a informazions studièdes dai esperc de l’Azienda provinzièla per i servijes sanitères, da la sanità fisica a chela psicologica, e che ge respon a la domanes che se fèsc ogne femena endèna chest trat de temp de la vita dassen particolèr, con consees pratics.
- N diarie de la gravidanza: con chest la mère pel meter su enstessa informazions, documenc e imagines che la peissa che sie de utol memorisèr.
- Ressorses educatives dates fora tras l assistent virtuèl (chatbot GEA): articoi, video e schedes en cont de argomenc emportanc desche la sanità endèna la gravidanza, l benesser mentèl e l se enjgnèr a comprèr.
- Link a la Community de suport: n spazie virtuèl olache la mères pel troèr i referimenc che ge serf per baratèr esperienzes e per se didèr fora l’una co l’autra.
L’App la vegn portèda dant da la mamanes te duta la pruma scontrèdes del percors per l nasciment. Ge vegn dat gran peis ence a la inclujion sozièla: l’App TreCMamma la é a la leta te trei lengac (talian, ingleis e franzous), per ge arsegurèr l azes ence a la mères forestes enscinuèdes al servije sanitèr provinzièl, e la seghitarà a miorèr e a svilupèr de neva soluzions per ge stèr apede a la femenes e a la families endèna chest viac maraveous de la maternità e del doventèr genitores, con chela de sporjer n suport en dut e per dut e personalisà.
La App TreC Mamma fèsc pèrt del projet “Sanità digitèla e inteligenza artifizièla – Strumenc per arvejinèr l servije sanitèr ai sentadins e per l svilup del sistem provinzièl”, aproà co la delibera de la Jonta Provinzièla dai 22 de dezember del 2022 , te chel che vegn pervedù n modul per la Prevenzion dedicà ai “Prumes mile dis de vita”. L obietif l é chel de realisèr e validèr n ecosistem de intervenc de sanità digitèla per compagnèr e didèr la femena, l piciol e la familia tel meter a jir comportamenc a favor del benesser de la familia tel chèder del viver a na vida sèna e del benesser psicologich.
Traduzion di Servijes Linguistics e Culturèi del Comun general de Fascia
