Di bichtegarsten naüge innhalt soinz:
• An kurs zo lirna machan da djüst djimnastika durch an chatbot: ’z izta khent inngevüart an video boma mage seng bia zo macha dise esertschitzie, nå un nå vo drai månat in drai månat vor da gåntz zait boma nåtrakk. Dise matardjéldar soin khent gemacht pittnåndar pitt hövaren, djinekòloge un fisiatre un iz khent draugeschauget von dökhtür von provintziàl sanitér Dianst. Ma halteta però zo khöda ke di sèlln baibar boda nèt stian gåntz garècht un magatn vorlìarn ’z khinn, mochan an earstn höarn soin dokhtur vorsa åhevan disa aktivitét.
• An khurtzan kurs atz baz ’z iz pezzar èzzan: disa App bart zoang bazzez iz pezzar èzzan vor di baibar boda nåtrang, disar kurs o khint gemacht durch an chatbot. Disar didaktik toal lekk vür an video vo bintsche minùttn un dena khurtze quiz z’sega bima hatt vorstånt. Da o di matardjeldar soin khent gemacht pittnåndar pitt hövaren, djinekòloge un nutritzionistn draugeschauget von Dietètik un Klinische Spaizarung Dianst von provintziàl sanitér Dianst.
• Kanal News: ’z izta khent augelekk a naügar kanàl zo geba informatziongen, boma mage gian z’sega garade vodar earstn sait vodar App. Disar strumént bart zuargem zo macha bizzan bahémme in nützar alle di naüng sachandarn boma vennt atz TreC Mamma un mage khemmen genützt von sanitér profesionistn o zo macha bizzan ben un bia ’z bartnse haltn di kürs zo boroatase aftz geborta, darvern di trèff augelekk un åndre sachandarn boda ågian in baibar un soin famildje.
Di baibar boda sa nützan disa App tarfan lai ainfach vornaügarnse, anvétze berdase nonet hatt inngestèllt bart vennen sa di naüng funktziongen balz bart inngian vor da earst bòtta.
Da lest naüge geat å in formular anonimo zo khöda bazma pensàrt boda di måmme mang vennen afte home page vo di TreC Mamma. Auzzovülla in formular lekmada zirka 10 minùttn un iz gåntz grüntlich zo vorstiana bazta håm mångl di nützar vodar App un asó pittar zait makmase auzpezzarn un vornaügarn hèrta mearar nå in sèll bodaz khint khött. Dar formulàr bart mang khemmen auzgevüllt sin atz 30 von herbestmånat 2025.
Dise vornaügarung soin no a tritt vürsnen von didjitàln dianst boda khemmen geopfart vor di gesunthait von müatar un von khindar in Trentino, dar trentinar sanitér Dianst lekkse asó no memarar untar zo venna hèrta pezzarne strumentn boda mang khemmen genützt vo alln.
Di App TreC Mamma
Augelekk von 8 von snitt von djar 2023, di App TreC Mamma izzese auzgenump vor daz sèll soin guat zo vorstiana bazta håm mångl di baibar boda nåtrang haltante kunt vo mearare disziplinen. Di date von sèlln boda nützan di App khön ke di laüt soin kontént: alle tage mearar baz 550 baibar nützan di App z’sega bazta khint getånt un maga håm alle di sèlln informatziongen boda soin nützlich zo zügla a khinn un bazta bèkslt in kreschran.
Date bia di App khint genützt:
• Sin haüt 4.804 baibar von Trentino håm abegevazzt di App in media håmsa 32 djar.
• Dar 12,5% soinz baibar nèt belesch. Dar 56% von baibar trakk nå vor da earst bòtta, dar 31% anvétze vor da zboate un di åndarn (12,5%) trang nå vor da draite odar mearare bòtta.
• Di App khint abegevazzt daz mearaste atz belesch (99.5%), ma makz tüan saiz atz inglés, saiz atz frantzés.
• In media di baibar boda abevazzan di App trang nå sidar 13 bochan.
• Di informatziongen boda gitt di App soin khent gesek 14.000 vert in di lestn sèks månat un 28.783 in lest djar un mearar baz 43.000 sidar azze iz khent augelekk vor zboa djar.
Di sachandarn mearar gesüacht un gesek soinz di sèlln boda ågian di kontròlle boma mocht machan balma paitet, bele sintome mochan håm an ailegen kontròll un bele anvétze soin vo alle tage balma paitet un no di informatziongen boda ågian di earstn drai månat boma nåtrakk.
Di App, darzuar in naüng schandarn boda soin khent inngevüart un boda soin khent khött da, opfart no ettlane åndre funktziongen, zbisnen disan:
• Seng di apuntamente von CUP: di sèlbart informatziongen von baibar boda khemmen inngètt balma inngeat in di App soin gepuntet pinn informatìf sistèm vodar Apss un gem zuar zo maga seng alle di apuntamente boma hatt genump durch in CUP von provintziàl sanitér Dianst.
• Drauschaung un nåstian: a kalandardjo boda boch vor boch steat nå in khinn un in allz daz sèll boda bèkslt in di muatar, khödante baz un bia zo tüana vor aniaglana fase.
• Zertifikarate innhalt: ma mage håm informatziongen studjàrt von ekspèrte von provintziàl sanitér Dianst boda gian vodar gesunthait von laip afta sèll psikologesch un rispundarn in vorsch boda aniaglaz baibe machten balz nåtrakk un khütten in pratika baz zo tüana.
• A tagepuach vor disa zait: pitt disan, di muatar mage innschraim alumma informatziongen un briavan bose haltet guat zo mocha gedenkhan.
• Edukatìf hilfe boda khint gètt durch an virtual asistént (chatbot GEA): artìkln, video un skède aftz bichtege tème azpe di gesunthait balma nåtrakk un bia zo boroatase vor balda bortet ’z khinn.
• Link aftz websaitn boda mang gem hilfe: a virtuàl platz boda di müatar mang vennen nützliche indiritze zo venna un zo geba fhilfe ummaz pinn åndar.
Di App khint vorgelekk von hövaren sa von earstn trèff bosa haltn pinn baibar boda nåtrang zo boroatase balda bortet ’z khinn. Ma hatta übarhaup gehaltet zo nemma inn alle: di App TreC Mamma iz in drai zungen (belesch, inglés un frantzes) zoa azta di mütar inngeschribet in provintziàl sanitér Dianst ma boda nèt vorstian daz belese mang nützan allz ummaz disa App, un aftz disan bege bartma gian no vür z’arbata un zo venna naüge solutziongen zo vüara di baibar un soine famildje in schümma viazo zo khemma måmme, pinn zil zo geba aniaglan baibe daz sèll boz hatt mångl.
Di App TreC Mamma khint z’soina drinn in prodjèkt “Didjitàl sanitér un artifitziàl inteligentz – strumentn zo nempra in sanitér Dianst in pürgar pezzrante asó in provintziàl sistèm”, ågenump pittar delibera vodar provintziàl Djunta von 22 kristmånat von dajr 2022 boda innhaltet an toal boda ågeat pròpio in “earstn tausankh tang lem”. ’Z zil iz auleng an didjitàl sanitér sistèm guat zo schütza un auzohalta di baibar un di khindar zo machanen zornìrn mode zo leba boda macht stian garècht saiz azpe laip, saiz azpe hirn.
Übarsetzt von Schaltarle vor di zung von Toalkamou vodar Zimbar Hoachebene
