Giovedì, 21 Gennaio 2021 - 18:53 Comunicato 153

Traduzione in ladino
Mobilità te Fascia: priorità al projet Bus Rapid Transit per l smaorament del trasport extraurban co la corieres

Scontrèda anter l President Fugatti, l Procurador del Comun General de Fascia e i Ombolc

Miorèr l sistem de la mobilità de Fascia, soscedan ejic positives tant per la comunanza che ence per i ghesć, e pissan a la Olimpiades da d’invern del 2026, vel dir dantdaldut investir sul trasport publich co la corieres, donca sun chel che ge vegn dit Bus Rapid Transit, per chel che l’é a la leta 60 milions de euro, de chi che 38 i vegnarà duré per la realisazion de operes infrastruturèles, e de na corsìa resservèda a la coriera per prescipech 18 chilometres de strèda sun 40 en dut che passa anter Fiem e Fascia. Presciapech etres 20 milions de euro i servirà, enveze, per renovèr i mesi a la leta, donca 35 corieres che l’é a Pardac. La Provinzia la darà l met de valutèr ence de etres intervenc, integratives respet al BRT, desche chi ouc envers l miorament di coleamenc tras impianc, sostegnui da la Comunanza, se ruarà de etres finanziamenc per corir amàncol na pèrt de la speises.
Endèna, se va inant co la neva ipotesa de projet che revèrda la varianta Ciampedel – Cianacei olache, descheche l’é jà stat dit acà na setemèna, vegn pervedù de spartir i lurieres te doi unitèdes funzionèles desvalives. Chest l’é l’ejit de la scontrèda stata en mèrtesc ai 19 de jené, olache à tout pèrt l President de la Provinzia Maurizio Fugatti, i Sorastanc generèi del Partiment Umst Mobilità Roberto Andreatta e de l’Agenzìa provinzièla per la òperes publiches Luciano Martorano, i Ombolc de Fascia, ensema col Procurador del Comun General de Fascia Giuseppe Detomas. Chesta scontrèda la é stata endrezèda dò da chela metuda a jir setemèna passèda coi Ombolc de Fiem.

 “Aon ciapà, dal Stat, n finanziament global, per la “Olimpiades”, de 120 milions – l’à dit l President Fugatti. De chisc na quota de 60 milions la vegnarà durèda per l miorament e l smaorament de la mobilità, con ejic positives che restarà en esser. L projet BRT l’é chel che la Provinzia la ge met dant ades ai teritories enteressé per na valutazion da fèr adum. L’é stat pissà ence a de autra ipoteses de mobilità, zis enteressantes e modernes, che aboncont les à limic per chel che vèrda sia sostegnibilità finanzièla. Podessa esser che dotrei de chestes, soraldut cheles che perveit n miorament di impianc portamont, les posse donventèr zeche da ge meter apede al projet che revèrda l trasport publich co la coriera, che l’é scialdi strategich. Se vegnissa ite de etres finanziamenc, per ejempie euroeegn, podassane i conscidrèr. L Recovery Fund, empede, per coche l’é stat pissà anché no l pel vegnir durà percheche l perveit tempes de apalt zis curc respet a na opera desche chesta”.

Andreatta l’à despiegà en curt chel che l’é stat fat enscin a la adozion col decret de la ipotesa projetuèla che à inom BRT. Del 2010 Fascia aea palesà n muie l besegn de miorèr l trasport publich. Dò, l miorament de la perferida basèda su la doura de la corieres l’à engaissà a se emprevaler de chest sistem de trasport. Del 2017 se à scomenzà a pissèr a n miorament de chest servije, tras la doura soraldut de mesi olache pel montèr più jent e che i é più sorii, ence con na entrèda zenza sćialins per didèr i utenc sun cariega da rodes, e donca col miorament de la strèdes, col svilup de corsìes spezifiches, neva fermèdes e piazai dai auti.
L’obietif – l’à dit Andreatta , - l’é dantdaldut l miorament del trasport extraurban co la coriera, servije “universèl”, che resta l zenter de la perferida de trasport publich”. “Chest model  - l’à dit amò Martorano – miora i tempes di viajes coi mesi publics, zenza pioramenc per i tempes per l trafich di auti privac, se no adertura n miorament, ajache la soluzions toutes smendra l peis del trafich publich.”

Te na scontrèda aposta, l projet l vegnarà vardà fora ensema coi Ombolc che ensema col Procurador Detomas, i seghitarà a lurèr per meter jù de etres projec soraldut tel ciamp de la mobilità tras impianc, integré co la infrastrutures jà en esser.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)

(cdt)


Immagini