In soi rede dar komisardjo Giovanazzi hatt geböllt khön vorgèllzgott dar provintziàl Djunta un in pürgar bodada håm gegloabet, gedenkhante ke dise zboa prodjèkte soin a bichtegar tritt zo kheara zo macha lem di kamòuschaft. “In dise månat habar gearbatet vil un höarante hèrta bazta håm gehatt zo khöda di laüt boda lem alle tage in lånt – hatt no khött dar Giovanazzi – ’Z zil iz daz sèll zo lazza Lusérn sterchar, pitt struktùrn boda servìrn in laüt: dar naüge sportìf zentrum un dar khindargart soin arbatn gemacht vor di djungen un vor di famildje, zo machase stian zo leba in lånt”.
Di zboa arbatn soin khent gezoaget punkt vor punkt. Dar khindargart 0-6 djar, azpe da hatt gedenkht di asesören Zanotelli, steat drinn in di stratedjìa vodar Provìntz zo sterchra di politike vor di famildje un di schual dianst in di lentar von pèrng. Ma lekk vür auzzorichta da alt schual, boda iz toal von stòrege, kulturàl schatz vo Lusérn, balse bart soin verte bartnda mang vennen platz dar zentrum 0-6 legante panåndar saiz ’z khindarèst saiz in khindargart. Disa arbat iz khent darkhennt vodar Djunta azpe da earst boda mocht khemmen gemacht pitt groaza aile, sichrante 1,2 mildjü euro, dar 85% von sèll boda bart khemmen gezert in gåntzan. “Disar prodjèkt – hatta khött di asesören – khint auz vonar arbat boda iz khent gemacht pittnåndar un geat inkontra in laüt boda asó mang leng panåndar arbat un famildja, opfrante edukatìf dianst pittnar hoachan qualitèt”.
Di arbatn auzzopezzra in sportìf zentrum, anvétze, soin khent ågenump vor an schütz vo 1,2 mildjü euro, dar 95% von sèll boda bart khemmen gezert in gåntzan. Dar prodjèkt lekk vür abezonemma ’z gehaüs bodada sa iz un boda romai iz gelekk kartza letz un bidar aumachan an åndarz boda bart håm apört un lokél boda bartn servìrn zo mudarase, ’z gehaüs bart håm an fotoltaische impiånto, darzuar barta khemmen gemacht a naügar spòrtplatz vor mearare spòrt. Disa arbart bart bidar gem dar kamòuschaft an modèrnegen platz boda mang nützan alle, laüt von lånt un turistn un mage soin dar haup platz vor allz bazta ågeat in spòrt.
An lestn dar vorsitzar Fugatti hatt gedenkht ke afta zimbar hoachebene di Provìntz iz drå untarzolega in gåntzan 26,4 mildjü euro vor strategesche arbatn: “Alle dise arbatn vor beng, schualn un sportif impiånte gian in an uantzega dirèktziong: stercharn di dianst vor di laüt asó aztada mang soin di konditziongen zo maga gian vürsnen zo leba un zo arbata in di lentar von pèrng”.
Zbisnen in bichtegarstn arbatn soinda, dar bege von Laaz – toaln 1 un 2, boda bartn khemmen gezert in gåntzan 12,7 mildjü euro un boda est soin drå zo khemma apaltàrt: dise arbatn leng vür zo macha an tunnel lång 250 mètre boma mage machan lai in nidarbart pittnar korsia vor di redar un haltn di stòregen galerian von bege vo est zo giana in aubart un darzuar prükkla un auzbetarn zuar in tal.
Darzuar izta vorgelekk auzzopezzra in Statàl Bege 350 afte hoachebene vo Folgrait zbisnen in km 1,5 un in km 7 untarlegante schiar 4,9 mildjü euro (’z izta dar tèknesche ekonomege prodjèkt) auzpezzarn un betarn in Statàl Bege 349 zbisnen in km 17,3 un in km18 tra Pian dei Pradi un in tunnel vor disa arbat soinda khent untargelekk 6,1 mildjü euro (briaf bia vürzovüara in prodjèkt). Un no barta khemmen gemacht a naügar vuaz bege atz Gasperi nå in Statàl Bege 349 vor 1,29 mildjü euro (’z izta dar tèknesche ekonomege prodjèkt) sicharn in tòkko von Statàl Bege 349 vo Folgrait boda nidarizgerütscht atz 12 von hornung 2024 (366 tausanhk euro, di arbatn soin nå zo khemme gemacht) un dar studjo zo macha a naüga umkhear atz Ekken vo Folgrait, da hattma geschètzt z’zera 1 mildjù euro.
Übarsetzt von Schaltarle vor di zung von Toalkamou vodar Zimbar Hoachebene
