Traduzione in mòcheno
Lear Zentrum as de autonomi, u’tsòk de auskenneta toalnemmer van Komitat
U’gaheift de òrbet ver za leing au der Zentrum no a mosnemm vourtrong van president Fugatti
[Mòcheno] Men vonk u’ za sechen s u’vòng van “Lear Zentrum as de autonomi”, a vourtschbinn augòngen bail der trèff van 50° jor van Zboate statut va Autonomi, bider pfaiert as de 5 van leistagest bail der To va de Autonomi, as hòt se gahòlten ka Borghetto: pet a mosnemm u’ganommen en vraita as de 13 van schantònderer, no a vourtschbinn van Maurizio Fugatti, de provinzal Junta hòt u’tsòk an pool va auskenneta ont studiareta lait abia toalnemmer van Komitat as miast mòchen vourtschbinnen ver za leing au der Zentrum as bart envire trong naiaòrbetn as kearn en de Autonomi.
“Der Zentrum bart se vourstelln abia trèffpunkt ont ausklòff van lait as studiarn ont suachen mòchen asn tema va de autonomi van lònt innrichtn, pet ausòndra òcht en de autonomi van regional innrichtn ont van autonome Provinz. De Provinz leik semm ver en doi projekt de kompetenz va auskenneta lait van Komitat, bou as toalnemmen istituzionaln ont akademische derstelltn, pet an plick en a euroregional aussicht”, hòt er tsòk der Fugatti.
Ver en sèll as keart s bèrt gem en kennen de Autonomi, drautschauk van assessor Simone Marchiori, bart er schaung za mòchen va schupfer drinn en Komitat ont sai’ a zòmmpint zbischn Komitat ont de provinzal Junta.
“Der sèll va hait ist der earste bichte tritt ver za vòngen u’ der projekt asn Lear zentrum: der inser sistem va sèlber regiarung ist runt bichte gaben ont der ist es nou iaz ver en verpesern va de lòntschòft, ont s ist rècht as van Trentin kimmps gem mear òcht as de ausònderkaitn ont as de moglechkaitn asn a regiarung as leik en de mitt de Autonomi. De doi naiòrbet bart sai’ an untestitz ont an paispil ver òndra lander aa”, hòt er tsòk der Marchiori.
Der zentrum, as bart miasn sai’ an zòmmpint zbischbn de istituzionaln ont akademische birklekaitn as sai’ as de lòntschòft ont as schoa’ iaz òrbetn as de Autonomi, bart miasn òrbetn as mearer saitn: va de suach as de sistem va selberregiar pet de lokal, stòtt ont europeiche politik asn inser sistem, ont nou lòng kennen de kultur va de Autonomi ont mòchen naiaòrbetn ont organisiarn zòmmtrèffn, seminar, bischòft diskussion, nazionaln ont internazionaln zòmmòrbetn asou za leing s aigene bissn en de hent van istituzionen ont van enteressiaretn.
De mosnemm u’ganommen paschraip ber as toalnimmp en Komitat, ver de Provinz nimmp toal de iberòll viarer van Dipartiment ver de òllgamoa’innricht keing de korruzion ont turchsichtekait Valeria Placidi as mòcht abia zòmmpint zbischn der Komitat ont de provinzal innrichtn drinnganommen.
S nimmp toal der Simone Marchiori ont òndra toalnemmer aa: der iberòll viarer van Storische Museum van Trentin der Giuseppe Ferrandi, as mòcht abia drauschauer van Komitat; der iberòll sakretare va de Fondazion Bruno Kessler der Andrea Simoni; de learer va de Universitet va Trea’t der Luigi Blanco ont der Fulvio Cortese; der suacher va de Universitet van studi va Napoli L’Orientale de Floriana Galluccio, de leareren va de Universitet va Innsbruck de Esther Happacher, de vourstea’ner van suachgrupp van Institut va studi federali comparati va Eurac Research de Elisabeth Alber.
De toalnemmer hòm gem de sai’ oa’nekait za nemmen toal en Komitat; ver de doi toalnemm hòt men koa’ rècht za kemmen zolt, ober s kimmp derkennt an zuazol ver de kostn as men hòt gahòt.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini