Dar perkùrs geat nå in zboa sektzióngen. Da earst redet von Rheo Martìn von Padrèzz un stèllt vür di pildar von kunstlar, gelekk nåmp in sèlln von groazan künstlar von ‘900, boda håm gehatt an ainfluss aftz imen. Di auzlegom bart soin geraichart von panèln in drai zungen: azpe biar, belesch un taütsch, pildar von arkìf un video, boda kontàrn mearar von kontèst, bosa soin gebortet un vodar kunst vodar figùr.
Da zboate sektzióng bart soin vor in Elvio Fachinelli. Durch a zait-perkùrs, sachandar von arkìf, pildar, video un originàlege dokuméntn un fòldje vodar zait, dar pesuchar mage darvérn mearar von kunstlar, von bichtegarstn pildarn un von ainfluss bosa håm gehatt atti gedénkhan vodar zait. Di auzlegom provàrt o zo spiegara di malamentrarstn pensìare von kunstlar, drinnvångante di pesüachar in a tiavez geleba.
Zo spèrra in prodjèkht barta soin a vollar progråmm trèff. Allz bazta ågeat in Pedrazza bart khemmen geschribet in an katalóg von kunst-stòrische Lorenzo Ferrarese, ummadar von kuratörn vodar auzlegom pittnåndar pittar Elena Nicolussi Giacomaz un Maura Bello. Dise gedénkhan bartn khemmen vürgestèllt dar kamòuschaft an vraita 29 von madjo di 20.30 datz abas in setz von Kulturinstitut Lusérn o, inan abastrèff boda bart ågian in groazan künstlar von ‘900, boda håm gehatt ainfluss affon Pedrazza.
’Z bartnda khemmen gemacht o mearare trèff zo reda von Elvio Fachinelli, pitt studjös un bizzar vo meararnen bichtegen schualn un universitétn. Dar earst trèff bartze haltn atz 27 von prachant 2026 di 17.00 in tages pitt Gianluca Solla, protagonìst vo “La magia del disegno: quando le immagini curano”. Darnå barta soin dar trèff pinn Gioele Cima, boda bart trang a gedénkha pinn titl “L’importante è che se ne parli? Fachinelli e il futuro della salute mentale”. Atz 11 von höbiat 2026 di 17.00 in tages barta soin dar Pietro Barbetta pinn trèff “Il desiderio dissidente in Elvio Fachinelli”, boda bart ren vo fraihait, vo Unbewusste un vodar soziàl-kritìk in di psikanàlise. ’Z spèrrta dar trèff gehaltet vodar Erica Ferrario, an såntzta 5 von herbestmånat di 17.00 in tages pinn titl vo “Elvio Fachinelli e l’asilo autogestito di Porta Ticinese a Milano” un von Sergio Benvenuto, atz 12 vo herbestmånat hèrta di 17.00 in tages pitt “Fachinelli: fidarsi dell’incoscio”. Di trèff bartn soin durchgevüart vodar STAP, Società Trentina Altoatesina di Psicoanalisi, da bartn soin offe vor alle un bartn o soin an okkasióng zo vortiava bazzaz hatt hintargelatt dar Fachinelli durch mearare perspektìven.
Di auzstèllom “Laüt vo Lusérn” bart soin offe alle tage von 24 von madjo fin atz 31 von bimmat 2026 in Museo Lusérn. Zo bizzasan mearar makma gian atti websait www.lusern.it , atti social von Kulturinstitut odar årüavan in 0464789645.
Übarsetzt von Kulturinstitut Lusérn
