Traduzione in ladino
La 39eisema Conferenza de la Mendranzes linguistiches reta dal assessor Marchiori
[Ladino] En mercol ai 20 de november dadoman, te Sala Trentino, aló da la senta de Piazza Dante, l é stat la 39^ Conferenza de la mendranzes linguistiches, reta dal assessor provinzièl a la politiches per la cèsa, patrimonie, demanie e promozion de la cognoscenza de l’Autonomia Simone Marchiori, dessema co la sorastanta del Servije mendranzes linguistiches e relazions esternes Elisabetta Sovilla. À tout pèrt a na vida digitèla ence l assessor regionèl Luca Guglielmi e sacotenc raprejentanc de la comunitèdes de la mendranzes storiches ladina, mochena e zimbra, anter chisc aministradores locai, membres del Cda di Istituc culturai e l’Autoritèdes per la mendranzes linguistiches.
Marchiori l à rengrazià duc chi che à tout pèrt per sie contribut per la soravèrda e promozion de la mendranzes linguistiches e l à recordà la scontrèda del Consei provinzièl stata la dì inant, reta scialdi dal assessor medemo su encèria del president Fugatti, dintornvia i deric de la mendranzes. “De fat chesta Conferenza l é na continuazion de la scontrèda de angern”, l à dit, col rercordèr la azions de la Jonta provinzièla per la zones olache vif la mendranzes linguistiches e che les cogn ge fèr front ai problemes de la arees da mont.
Se à donca scomenzà a rejonèr del argoment al orden del dì, en cont del servije de trasmiscion di canai austriaches Orf 1 e Orf Sport sui teritories de la mendranzes linguistiches, ma ence sun dut l teritorie provinzièl, per chel che se va envers n miorament de la cantità e de la calità de la difujion, che se perveit de meter a jir prest, che jirà a corir zones no toutes ite te la pruma ipotesa, desche l’area Lenzi te la Val di Mochegn.
“Se trata de na oportunità per duc i sentadins de la Provinzia, che i arà l met de scutèr e se confrontèr con n lengaz a nos vejin e per la mendranzes germanofones l met de aer trasmiscions televijives tel lengaz de referiment: una scomenzadiva emportanta te chela che la Provinzia creit dassen”, l à dit amò Marchiori.
Ence Sovilla l’à sotrissà che se trata de “N projet che raprejentea n vèrech emportant per na azion per se arvejinèr ai lengac, en generèl de plurilinguism e donca de na dimenscion te chela che la mendranzes te nosc teritorie à na funzion de gran emportanza”, col recordèr che chest projet l se basa sul miorament de la calità tecnica de la trasmiscions Orf. Con chesta scontrèda l é stat confermà donca la neva spezifiches tecniches e de contrat e l enteres per meter a jir l servije per i doi egn che vegn.
Fenì su de rejonèr en cont de chest l é stat dit fora l apuntament che vegn de la Conferenza pervedù per de jené del 2025, te chel che vegnarà fat fora la spartijon del Fon provinzièl per la mendranzes e la politiches de intervent per l stravardament e la promozion de la mendranzes medemes.
Traduzion di Servijes Linguistics e Culturèi del Comun general de Fascia
(cdt)
Immagini
