Mercoledì, 18 Dicembre 2024 - 17:00 Comunicato 3582

Traduzione in ladino
L servije atif de assistenza, l muda

Anter la neves sarà chela del nef endrez di oraries di ambulatories, l azes se podarà l fèr tras chiamèda al 116117

[Ladino] Vegnarà endrezà a na vida neva con scomenz da chest an che vegn, l servije atif de assistenza. L é stat stabilì en vender ai 13 de dezember da la Jonta provinzièla che, aldò de la indicazions del assessor a la sanità e a la politiches sozièles Mario Tonina, l’à metù ju i endrec neves e dat mandat a l’Azienda provinzièla per i servijes sanitères de portèr dant n pian atuatif dant che sie fora la fin de jené del 2025. Desvaliva neves che, aldò de la Cordanza integrativa provinzièla di dotores de medejina generèla sotscrita de jugn passà, les vel endrezèr n servije più flessibol e adatà ai besegnes reèi de la popolazion col miorèr la ressorses e la percacenza del sistem.
“Chest endrez nef del servije atif de assistenza l raprejentea n vèrech de valuta per balanzèr la perferida sanitèra aldò di besegnes reèi de la popolazion – disc l assessor Tonina. Meter a jir neva modalitèdes con azes tras l numer 116117 e endrezèr a na vida neva i oraries via per la net, dèsc l met de arsegurèr n servije pervalif e struturà, e de responer a na vida concreta a la domanes di sentadins. Tel medemo temp, l é emportant che l sistem sanitèr l abie n balanzament anter calità de l’assistenza e sostegnibilità. Con chest intervent, se vel confermèr noscia volontà de lurèr per na sanità apede a la persones e bona de se miorèr con eles e dèr na responeta a nesc profescionisć sanitères dintornvia la segureza”, l sera su l assessor provinzièl.
[ JM Nimhas - stock.adobe.com]

L rilevament de la ativitèdes metudes a jir te la sentes del servije atif de assistenza l à metù al luster na doura desferenta del servije da man de la popolazion ti desvalives oraries: tel ultim trat de temp vardà fora, endèna i sie meisc dal 1 de jené del 2024 ai 30 de jugn del 2024, i intervenc da mesanet a les ot da doman i é stac l 12% del total. Estra apede i intervenc via per la net i é caraterisé soraldut da n “consult per telefon” respet a la autra sorts de intervent te ambulatorie e a cèsa. Chesta perzentuèles les conferma l besegn de n endrez nef del servije per responer miec ai besegnes drec de la popolazion.

La neves prinzipèles dintornvia l endrez les perveit:

  • azes unificà al servije demò tras l numer unich 116117;
  • ge dèr su a la Zentrèla operativa 116117 dotores de assistenza primèra con atività a ora (ex dotores del servije atif de assistenza), con formazion spezifica e con funzions de coordenament di intervenc, chisc dotores i podarà fèr consulenzes per telefon o, se fèsc besegn, meter a jir intervenc a cèsa o te ambulatorie con dotores sul teritorie (te sentes metudes dant da la Azienda sanitèra opuramenter con reperibilità a cèsa);
  • endrez nef di oraries via per la net: endèna l trat de temp da mesanet a les ot da doman l servije l vegnarà arsegurà da dotors de la Zentrèla operativa 116117 con atività de consulenza per telefon direta e, canche fèsc besegn, da dotores che l é a la leta per meter a jir intervenc aposta a cèsa o te ambulatorie, no muda l servije te la autra ores, che fossa l orarie de orida de la sentes atuèles, semper con chiamèda dantfora da pèrt del utent al 116117, da les ot da sera a mesanet via per la setemèna, da les ot da doman a mesanet de sabeda, de domenia e ti dis de festa, da les diesc da doman a mesanet en vea de festa.

Dant che sie fora ai 31 de jené del 2025, l’Azienda provinzièla per i servijes sanitères portarà dant n pian atuatif che vegnarà sotmetù a la autorisazion de la Direzion generèla del Dipartiment de sanità. L é ence pervedù na lingia de informazions per meter en consaputa la popolazion dintornvia la modalitèdes neves de azes al servije.

Traduzion di Servijes Linguistics e Culturèi del Comun general de Fascia

(cdt)

Fonte: Ufficio Stampa

Versione Stampabile

Immagini

Visualizza

Potrebbero interessarti: