Focus dintornvia la didatica sorafora la seides e neva ressorses digitèles. Marchiori: “Creèr l davegnir a scomenzèr dai joegn”. Gerosa: “L confront anter i teritories l é n valor enjontà per la crescimonia formativa di studenc”
“L Euregio te la scoles” tel prum mèrtesc del Euregio 2026
Traduzione in ladino
[Ladino] L é pea via a Casa Maggioli, senta del Ofize de informazion e coordenament del Euregio Tirol-Sudtirol-Trentin, la quarta edizion di “Mèrtesc del Euregio”. L prum apuntament del 2026 l ge é stat dedicà a la scola, con chela de stabilir la neva strategies didatiches per sostegnir percorsc de educazion zivica, l ensegnament del todesch e la cooperazion sorafora la seides. A chesta scontrèda, che la é nasciuda tras la colaborazion en esser anter Euregio, Departiment Istruzion de la Provinzia autonoma de Trent e IPRASE, à tout pèrt dozenc de la populères e mesènes. A chesta scontrèda à tout pèrt l assessor provinzièl con delega a la promozion de la cognoscenza de l’Autonomia, Simone Marchiori, che à portà dant i saluc de l’assessora a l’istruzion Francesca Gerosa. “Fèr ruèr ite l Euregio te la scoles l é na priorità: vel dir formèr la neva generazions ai neves valores del stèr adum, de la colaborazion e del dialogh anter i teritories. Da chiò se costruesc l davegnir, a scomenzèr dai joegn e da la capazità de nesc teritories de crescer duc adum, no despartii”, à dit Marchiori. L era ence l soraintendent scolastich per la Provinzia autotonoma de Trent, Giuseppe Rizza, che à comentà: “I projec del Euregio califichea la perferida formativa de la scoles trentines e smaora l sentiment de partegnuda european. L confront anter sistemes scolastics, la dedizion di dozenc, l’atenzion al plurilinguism e la doura de ressorses didatiches inovatives deida a endrezèr percorsc educatives de maor consaputa, orii e struturé”. Rizza estra apede à manà e valorisà l messaje del assesor Gerosa, se palesan a una coi obietives de la scomenzadiva. Endèna l event Gerosa, de fat, à declarà de aprijièr la scomenzadiva, sotrissan l valor de la scomenzadiva en esser: “L Euregio, per noscia scoles, l é na oportunità concreta, che dèsc l met de renforzèr la competenzes linguistiches, i percorsc de educazion zivica e la cognoscenza anter i trei teritories. La esperienzes didadiches sorafora la seides à n valor enjontà per la crescimonia formativa di studenc, col favorir na maor consaputa de la dimenscion euroregionèla e del contest internazionèl”.
Endèna la sescion l é stat portà dant la sacotanta evoluzions de la perferida formativa Euregio per l an de scola che vegn. Dintorinvia la valuta de chisc strumenc à rejonà Elisa Bertò, raprejentanta del Trentin tel Secretariat Generèl del Euregio: “La lingia de la proponetes per l an de scola che vegn perveit sacotanta novitèdes, a scomenzèr dal restyling de “Euregio fa scuola”, che ades met a la leta n portal online più intuitif e la scomenzadiva “Euregio goes school”, l nef projet Interreg Tèlia-Austria. La perferida didatica la doventa scialdi più dinamica: l format “L’Euregio incontra le scuole” l doventa più modern con laboratories de projet management e ativitèdes de gaming educatif. Resta l focus en cont de la fradaes anter scoles, confermèdes desche pilèster che no pel mencèr per l dialogh anter studenc”.
Te la seconda pèrt del event ge é stat dat luster ai dozenc: col contèr esperienzes concretes, desvalives ensegnanc de desvalives istituc scolastics à portà dant stories de suzes abudes co la fradaes, con projec e strategies per l ensegnament del todesch, con colaborazions con enc teritorièi e col meter en doura l Pat bilingual. La scomenzadiva se à serà su con l laboratorie operatif, out a binèr su conscidrazions en cont de la scomenzadives en esser e a endrezèr adum de neves strumenc didatics che i vegnarà implementé con de setember.
Fotoservije de Euregio.
Desćèria l service video > https://drive.google.com/drive/folders/13u1QSSPu0R_qmZ7_z7gRUwZ_WAkHjrTH?usp=share_link
Traduzion di Servijes Linguistics e Culturèi del Comun general de Fascia
(cdt)
Immagini
