Ma dar summar atz Lusérn höart sichar nèt au da. Dòpo in abas pinn Arturo Nicolussi Moz boda hat gezoaget diapositivan von lånt in an trèff gehoazt “Fraiern pildar – Diapositive in libertà” un dar recital pittar Chiara Turrini “Dar pèrge zoagetze in di pildar von baibar” zo gedenkha in fotografo Flavio Faganello, 20 djar dòpo azzar iz gestorbet, atz 17 von snitt in setz von Kulturinstitut izta khent gezoaget dar docufilm “Panåndar saibar uantze”, gemacht von Stefano Fabris vor in Kulturinstitut sèlbart in okasiong vodar Europeada 2024 dar tornéo vo palù von zungmindarhaitn boda hatt genump toal di squadra vodar taütschan zimbar zungmindarhait o. Un an lestn atz draitzane von herbestmånat, di zene mòrgas, hèrta in setz von Kulturinstitut, dar stòrego Quinto Antonelli bart haltn a konferéntz übar un ruòl von baibar in da alpinar kamòuschaft.
“Darzuar disan trèff – hatta no khött di Nicolussi Giacomaz – vo haür vort dar Muséo hatt gelekk in kalandardjo mearare labör vor di khindar, boda soin khent durchgevüart vodar biologa Francesca Mor. Aniaglan earst un draite såntzta von månat von abrèl vort sin in bimmat soinda khent hergerichtet, defatte, åna zo mocha zaln, spiln un moméntn zo macha khennen di umbélt vor khindar von drai sin afte sèks djar un von sèks sin afte ulef djar pinn titln “di djarzaitn von balt”, “detektif von balt”, “tschell bolf” un “billege spurn”.
Dar summar atz Lusérn opfart o “Burtzan. Di baibar vo Lusérn”, “Radici. Le donne di Luserna”, a fotografege prodjèkt boda bill kontarn di sterche un daz schümma von baibar vo Lusérn zbisnen haüt un di djar boda zuarkhemmen. Bia soinsa di gesicht von zimbarn baibar vo haüt? Baz vor a stòrdja kontàrnsaz? Baz barta khemmnen gedenkht vo üs in kau inan tage von djenearatziongen boda bartn nåkhemmen? Baibar boda lem in lånt odar boda abeståmmen von lånt, vo aniaglana eltom, mangse machan fotografarn gratis, an sunta atz viarunzbuantzekh von snitt nidar in Muséo Lusérn von fotografo profesionìst Stefano Fabris. Dar Kulturinstitut bart denna schenkan di foto in alle di sèllnen boda bartn nemmen toal.
Vor berdasan bill bizzan maearar odar meldnse iz genumma årüavan in nummar 0464789645, innate 1 odar durch mail info@lusern.it.
