Übar 2.400 di foto boda soin khent inngètt vor in fotografege konkurs. Vor da earst sait izta khent zornìrt di foto von Fernando Tait vo Kronmetz
Kalandardjo von Euregio 2027, åhevante von 30 von bimmat bartar khemmen auzgètt
Traduzione in cimbro
[Cimbro] ’Z izta drå zo riva dar kalandardjo Euregio 2027: Dar iz khent gezoaget atz Innsbruck an sunta atz 25 von bimmat von hauplåntsmånn von Tiról Anton Mattle pittnåndar pinn autör boda håm gemacht di fotografìan zornìrt vor disarn editziong un izta khent ågeheft auzzogebanen o. An ande von fotografege konkurs soinda khent zornìrt 49 fotografìan un da sèll von Fernando Tait iz khent gehaltet vor da earst sait. In soi foto sekma zboa zboa aisvögel boda kraützarn di snèkk sovl azpez berat a simètresche djeometrì. Åndre foto machan raichar di saitn månat vor månat, groaze pildar odar collage vo drai foto.
Mattle izzese khött kontént von mearar baz 2.400 foto boda soin zuargerift: “Da håm genump toal in vil von Tiról, von Südtiról un von Trentino un vil soinz di laüt boda alle djar vorsan in kalandardjo, ditza besteteget ke dar interèse boda iz vor in Euregio, vor soine auzseng, vor soi kultùr un vor soine laüt iz hèrta gelaich".
Dar vorsitzar vodar autonome Provìntz vo Tria Maurizio Fugatti un dar vorsitzar vodar autonome Provìntz vo Poatzan Arno Kompatscher vorsan in pürgar von Euregio zo nemma in kalandardjo vor soi haus odar vor in platz bosa arbatn, saiz in sèll auzohenga saiz in sèll zo postara aftn tisch, asó z’sega månat vor månat di diversitét von Tiról-Südtiról-Trentino. Dar prodjèkt gitt vert dar arbat von fotografe boda håm genump toal: übar di grentzan soine pildar zoang merare sachandar bosa håm se sèlbart gelebet pittnåndar un übar di khennzaichan von drai lentar. Darzuar dar kalandardjo haltet inn nützliche informatziongen übar di lentar un di dianst von euregio, un repetze un sachandarn zo giana z’sega.
Dar kalandardjo Euregio 2027 mage khemmen genump åna zo macha zaln sin azta bartn soin verte di kòpie, saiz in sèll zo henga au afte maur saiz in sèll zo postàra aftn tisch, dise di plètz bodar khint auzgètt: ka Tria in åmt von Euregio (Haus Moggioli, bege Grazioli 25), in daz zentràl setz vodar provintziàl Vüarom (Platz Dante 15), in di “provintziàln Schaltarla vor di laüt” un in di informatziong pünkt von Kamöündar vo Tria un Lavis.
Ka Poatzan in setz von Euregio (haus vodar Bage in Platz von Khorn) un in di provintziàln palètz. Darzuar makmen vennen in gåntz Südtiról in di forestél ispettorétt un in di zentràl bibliotèke.
Atz Innsbruck in Euregio- Infopoint un in Landhaus. Anvétze, azma bill, dar kalandardjo bart khemmen geschikht durch post 'z iz genumma vorsanen schraibante durch e-mail atz euregio@tirol.gv.at.
Azmasan bill bizzan mearar un in roatordnung von plètz bodar khint auzgètt dise makmase vennen afte websait von Euregio aftz disan indiritzo www.euregio.info/calendario.
Da gekhluppet di pdf von kalandardjo un in roatordnung von setz bomen mage vennen in Trentino
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
