En Argealpprais 2025 meing toalnemmen innrichtn as sai’ en paudorver, as unterstitzn de jungen unternemer en de platz as stea’ aus van stòttn: bèrkn ont start-up as trong vour bèrkprojektn en an ausònder ont original vurm, iberhaup as kearn de jungen, pet en prauch van earstn natural materialn van plòtz; schualn, bou as inntschrim sai’ studentn van viarzen jor envire, as tschbinnen projektn va recycling ont upcycling ver za gem bèrt en de ringbirtschòft ont en biderprauch van earstn natural materialn van plòtz.
Der projekt miast sai’ schoa’ u’pfònk, ober nou nèt garift. S meing nèt kemmen vourstellt projektn zuazolt pet europeische programm va dirèkta regiar.
Zbischn de projektn vourstellt barn earst kemmen tschèrlt de pestn van an earste lokaltschèrl, as derno an iatz dorf bart vourstelln en an internazional praisgericht. De doi bart tschernen de pestn secks projektn (drai ver òll kategori), ont de bart gem der prais garift der Zòmmtrèff van Arge Alp Stòtt Viarer as bart se hòltn ka Trea’t as de draiaontzboa’sk ont as de viaraontzboa’sk van schanmikeal 2025. Der internazional derkenn, ver òll kategori, gip zboatausnt euro ver en earste prais, tausntvinfhundert euro ver en zboate ont tausnt euro ver en dritte prais.
Der bando ont de vrogtoalnemm kònnt men vinnen as de sait: https://www.argealp.org/it
Arge Alp ist an òrbetgamoa’schòft gagrunt as de zbelva van schanmikeal 1972 ka Mösern en Tirol, pet en zil za stitzn de neat van alpineplatz as enteressiarn ungefèr secksaontzboa’sk milionen va lait. S sai’ toalnemmer va Arge Alp s Taitschlònt pet en Vraistòtt va Baiern, s Osteraich pet de Länder van Vorarlberg, van Tirol ont va Sòlzburg, s Baltschlònt pet de autonome Provinzn va Poazn ont va Trea’t ont de Region Lombardia, de Schbaiz pet de Kantonen van Grigioni, van San Gallen ont van Ticino.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
