Al Pest Arge Alp 2025 pel tor pèrt la realtèdes che l é ti raions soraldut rurèi, che engaissea la imprenditorialità di joegn ti raions periferics; la firmes e la start-up che svilupea projec de azienda inovatives e originèi, soraldut per i joegn, co la doura de materies prumes naturèles dal post; la scoles, con studenc scric ite che abie amancol 14 egn, che svilupee projec de recycling e upcycling per valorisèr la economia zircolèra e l rezicle de materies prumes naturèles locales. L projet l cogn esser jà te na fasa de atuazion, ma no amò fenì su. No se pel portèr dant projec finanzié con programes europeèns a gestion direta.
Anter i projec porté dant vegnarà cernù fora, dant i finalisć endèna na selezion locala, che do ogne raion ge portarà dant a la juria internazionèla. Chesta la cernarà fora i sie projec miores (trei per ogne categoria), che i vegnarà premié endèna la zerimonia che vegnarà endrezà dintornvia la Conferenza di Capi de Goern Arge Alp perveduda a Trent ai 23 e 24 de otober del 2025. L recognosciment internazionèl l perveit, per ogne categoria, 2.500 euro per l prum pest, 1.500 euro per l secondo e 1.000 euro per l terzo.
L avis de concors e l modul de partezipazion se i troa sul sit: https://www.argealp.org/it
Arge Alp l é na Comunità de lurier metuda su ai 12 de otober del 1972 a Mösern, tel Tirol, col obietif de ge fèr front e sostegnir i besegnes de duc i raions alpins e che tol ite 26 milions de jent. I membres de Arge Alp l é la Germania col Stat de Baviera, l'Austria coi Länder Vorarlberg, Tirolo e Salisburgo, la Tèlia co la Provinzies autonomes de Busan e Trent e la Region Lombardia, la Svizra coi Ciantons di Grischun, San Gallo e Ticino.
Traduzion di Servijes Linguistics e Culturèi del Comun general de Fascia
