Da vorgånnate stadjong håmda gesek in Boletì von lavìn 5,7 mildjü laüt, von vraita atz 28 von bintmånat bartar bidar khemmen auzgètt

In Trentino barta bidar åhevan auzzogiana dar boletì von lavìn

[Cimbro] Dar boletì von lavìn von Euregio, boda dekht Südtiról, Trentino un Tiról geat auz vor da acht bintar stadjong. Aniaglan tage khinta khött bia ma sait gelekk pinn lavìn vor di 24 urn un vor alle drai di Lentar. Nidargelekk pittnåndar von drai dianst vor di lavìn von drai lentar von Euregio, dar boletì khint geschribet in simm zungen un zbisnen disan taütsch, belesch un inglés.
In Trentino hattz gesnibet djüst vor da earst bòtta in disa stadjong. In di vorgånnatn tage hattz gesnibet sin züntrest in teldar, ’z hatt nèt gemacht kisa biavl snea, ma aftz zèrte saitn iztasan khent sin an halm mètro. Dar starch bintn au hoach afte zimmen hatt ummargetribet in snea, asó aftz zèrte saitn iz gestånt plèkhant un aftz åndre hattz gemacht schaülane binthauvan. Di laüt boda gian pa pèrng un khennesan drinn schöllatn hèrta stian vort bait vo disan binthauvan, ombrómm ’z iz iantrar azzase nidarmolàrn un vången untar berda sèmm iz.
In disa djarzait, vor berda macht ski alp iz bichte stian au pinn oarn ombrómm ’z ventzarnda au skaffan un khnottn (sharks), berda, anvétze, geat lai zo vuaz inn pa pèrng mocht stian atento nèt zo slipfa ombrómm ’z iz dèstar vennen ais afte staing.
Dar boletì in di bintar månat izzese gezoaget mèchte bichte zo bizza djüst bia ’z izta di zait un dar snea, saiz vor di sèlln boda gian pinn skin saiz vor da zivìl schütz. Da vorgånnate stadjong, dar boletì iz khent gesek in gåntzan vo 5,7 mildjü laüt machante asó an naüng rèkord.