Dò l moment resservà al benvegnù e ai saluc da pèrt del diretor Valeri e ai saluc istituzionèi da pèrt de l’ombolt Kostner e del raprejentant de l’Euregio Christoph von Ach, la zerimonia la é jita inant co la consegna di petorai personalisé a duc i atlec premié.
L messaje de l’assessor al sport de la Provinzia autonoma de Trent, Roberto Failoni, l’é stat portà dant da la diretora de l’Ofize Sport Tamara Gasperi: “ L’é per voi joegn che fajede pèrt di trei raions de l’Euregio, Trentin, Sudtirol e Tirol, na ocajion preziousa per stèr adum, spartir coi etres l gust per l sport, ve goder e ve sproèr, co la consaputa che chiò con voetres l’é arcedadores e volontères de mèrelenga talièna e todescia a la leta per ve engaissèr e didèr. Na setemèna per se cognoscer, se scontèr e stèr adum olache chel che ve lea l’é l sport , n sport de chel che i campions che l’é chiò anché i raprejenta i valores, che l’é chi de la solidarietà, de la lealtà , del respet per la persones e de la regoles, che l’é i valores fondamentèi de la sozietà”.
I saluc del President de la provinzia autonoma de Busan, Arno Kompatscher, che l’é ence assessor al sport, i é stac porté dant da la vizediretora de l’Ofize Sport, Laura Savoia, che l’à metù al luster l pensier del goernador “l sport, scola de vita”. Per l President Kompatscher - l’à dit Savoia – l Sport Camp de l’Euregio l’é na gran ocajion per i joegn per miorèr sia competenzes linguistiches e sia cognoscenza culturèla”.
“L sport l’é na atività che met adum e fèsc doventèr fort l sens de comunanza. L’Euregio Sport Camp l’é apontin chest: l met adum i joegn di trei raions te n contest de jech e de divertiment. Canche se trata de atività fisica, de sport, l lengaz no l’é n problem e per chest nasc raporc de amicizia sorafora la seides”, l’é stat enveze l pensier manà da l’assessor al sport tiroleis e vize capitan del Tirol Josef Geisler.
La setemèna te Fascia di joegn de l’Euregio la se à serà sù l prum de aost, tel program ence la vijita al Vilaggio Viola de AC Fiorentina, squadra de balon che jia te la serie A talièna, che se arcedea apontin a Moena.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
