“Balda rift dar prachant, di schualn spèrrn un da schümma stadjóng khint - khütta dar diretór von Kulturinstitut Lusérn Willy von Polèz -, ’z lånt heft bidar å zo leba. Ünsarne auzlegom kontàrn alle djar att tausankhar turìstn, bazza nèt bizzan vodar zimbar mindarhait, von traditzióngen vo soinen laüt un vo soinar zung”.
’Z Haus von Prükk bortet vonan altz haus, boda nå haüt zoaget bida soin gest di haüsar von djardar ‘800. Gemacht vo zboa haüsar ågehenk pittnåndar, di auzlegom geat von stall aubart, fin zo riva in khuchln un in slafkhåmmarn von zboa quartìarn von XIX un von XX djarhundart, zbisnen sachandarn genützt alle tang un struméntn vodar arbat
von sèlln zaitn.
Bintsche bait von Haus von Prükk venntma di Pinakothek Rheo Martin Pedrazza, pinn 35 pildarn geschénkht von künstlar, gebortet atz Lusérn in djar 1924, pittnåndar pitt soin vatarhaus. In drain saln makma seng disénje un pildar gemacht nå dar künstliche untarsuchung, boda hatt nia vorgèzzt di huamat, Lusérn.
Nèt zo vorgèzza dar Forte Wèrk Lusérn, ummadar von gröazarstn von austroungarischar raich zbisnen Folgràit un Vesan, augemacht von djar 1908 fin in djar 1912. Nidargelekk attn Kåmp, hoach 1549 m, attn Wèrk Lusérn makma rivan zo vuaz, gianante nå in umman von tematischen staigela, boda zoaget bia di spurn von kriage håm gebèkslt daz khlumma lånt vo Lusérn un soi kamòuschaft. Haür, pròpio attn Wèrk Lusérn, bartma mang seng da naüge auzlegom vo pildarn “Donne in Guerra”: an auzstellung gemacht von MITAG, boda ågeat di baibar in di zait von earst Bèltkriage.
Zo vaira da naüge stadjóng boda åizgeheft, atz 14 von prachant, in setz von Kulturinstitut, izzese gehaltet di vorstèllom von libar “Ferito, morto, sepolto. Strutture sanitarie e cimiteri militari sugli altipiani di Folgaria, Lavarone e Vezzena”, geschribet von taütsch autór Rolf Hentzschel. Dar abas iz gest an okkasióng zo gedénkha bazzez iz gest ’z kriage un di toatn bo ’z hatt hintargelatt, 110 djardar spetar azta iz auzgeprocht daz earst Bèltkriage.
Dar Forte Wèrk Lusérn, ’z Haus von Prükk un di Pinakothek Rheo Martin Pedrazza soin offe alle tage fin an sunta 7 von herbestmånat un darzuar di såntza un di sunta von 13-14, 20-21 un 27-28 von herbestmånat. Zo bizzasan mearar un zo khoava di bildjéttn makma gian atti websait von Museo Lusèrn odar von Kulturinstitut Lusérn.
