Der video ont de brochure sai’ gamòcht kemmen van jungen van projekt TAGLab, an òrbetbèrk va grafese hoacha u’lear van Istituto Pavoniano Artigianelli per le Arti Grafiche va Trea’t as viart de studentn as garo garift hom de schual bail en an ring za vòngen u’ za òrbetn turch echta òrbetn. No an moment va teoretese ont praktese u’lear avn plòtz, de jungen hom gamòcht de zboa nochrichtplinder zòmm pet de techniker van Sektor Groasa Vrèssvicher van Provinzal Vicherdinst, ont de hom gabèckslt de ganauen temen en nochrichtplinder pet a vrischa, klora ont laichta sproch.
Der tutorial praucht s klòffen van cartoon ver za derklorn, en zboa minutn, de bichtestn regln ver za stelln zòmm ont pahòltn en an richtegen vurm. De brochure praucht bider de glaichn temen, ont gip a toal technisn nochrichtn pet a klora ont laichta grafik. S doi material bart kemmen gem zòmm pet de elekresn zai’ gem za prauchen sa a’ne zoln sa van Forestal dinst van Trentin ont menn kònnt s vinnen online aa.
S vourtschbinn geat au no sèll as ist kemmen derlep ont zòmmklaup as en lònt.
Van kontrolliarn van elekresn zai’ en de jarder ist araus kemmen as an 30prozent van zai’ hom probelm benn de kemmen nèt rècht galeikt oder de kemmen nèt kontrolliart en de zait.
Ver dòs ist kemmen tschbunnen za gem zòmm pet de schutzn plinder de informativen strumentn ver za desterer ont rècht prauchen sa.
Schau der video -tutorial, de brochure ont sèll as song de jungen grafesen
> https://drive.google.com/drive/folders/10qvHplcceeYfkicleSSXW96a_7qgIW7E?usp=share_link
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
