Ber ’z magda åvorsan
Dar schèk iz vor famildje boda vonen in di provìntz vo Tria boda bortet odar boda khint adotàrt daz draite khinn. Di muatar mocht håm zuargehöarung un vonung nå azpe da auzmacht da provintziàl normatìf un mocht gehöarn darzuar in gelaichege anagrafege khnof von khindar.
Di muatar darzuar mocht sa artbatn balda bortet odar balda khint adotàrt ’z khinn, odar mocht håm inngètt kontribute daz mindarste vor zbölf månat, siånka az nèt nå un nå, in di lestn vünf djar. Ditza maz varlért vor di khindar gebortet odar odotàrt åhevante von earst von hoachnach 2026.
Toal vest un toal darzuar
Dar schütz bèkslt nå dar ekonomesche konditziong vodar famildja geroatet nå dar ICEF Famildja: sin atz 48.000 in allz (400 euro aftn månat) vor di famildje pitt ICEF sin atz 0,40;
sin atz 30.000 euro in allz (250 euro aftn månat) vor famildje pitt ICEF obar di 0,40;
vor famildje pitt ICEF sin atz 0,70 odar åna ICEF daz mearaste soinz hèrta 30.000 euro un hèrta 250 euro aftn månat gèlt boda tarft khemmen gemeldet vor IRPEF.
Dar schèk khint auzgezalt in månat darnå azta iz gebortet odar azta iz khent adotàrt ’z khinn un sin azta ditza kompìrt di zen djar.
Von draite djar von khinn vort khinta vürgelekk an schütz vo 200 euro aftn månat vor di sèlln müatar boda khearn odar boda stian afte arbat, vor berda arbatet vor iz sèlbart o. Zo maga håm disan schütz mochtma zoang ke ma hatt gearbatet daz mindarste vor 180 tang ’z djar pellar boda khint inngètt dar vorsch, siånka az nèt nå un nå o.
Bia innzogeba in vorsch
Dòpo azta da provintziàl Djunta, pinn provedimént von 25 von vorgånnate madjo, hatt inngevüart a drai bèkslom, di vorsch saiz vor in toal vest, saiz vor in toal darzuar, mage khemmen inngètt garade vodar muatar darkhennt pinn SPID odar pittar eletronesche khennkart (CIE) odar durch di patronètt boda soin in di provintz vo Tria. Dar lest tage zo maga inngem in vorsch iz khent vorlengart sin atz 180 tang dòpo azta iz gebortet odar azta iz khent adotàrt ’z khinn. Vor haür varlernda di regln inngevüart lai vorz djar 2026. Vor di khindar gebortet odar adotàrt vor atz 30 von prachant 2026 dar vorsch vor in toal vest mage khemmen inngètt vor atz 31 kristmånat 2026 un varlért vor di månat hintar o.
Zo bizzasan mearar makma gian z’sega afte websait: Assegno di natalità per il terzo figlio
Übarsetzt von Schaltarle vor di zung von Toalkamou vodar Zimbar Hoachebene
