Traduzione in ladino
EuregioSummerCamp 2023, se pel se enscinuèr dai 15 de firé inant
L camp l é stat endrezà anter i 20 e i 27 de aost a San Valantin de Brentonico. En mèrtesc che vegn te Casa Moggioli vegn portà dant la scomenzadiva
Dai 15 de firé se pel se enscinuèr al EuregioSummerCamp 2023, che chest an l é stat endrezà dai 20 ai 27 de aost e che, aldò da la tradizion, l rejonarà de natura. Presciapech 60 tousc i vegnarà envié te n alberch a San Valantin de Brentonico, tel Trentin, olache i podarà passèr na setemèna de gran emozions e se fèr neves amisc a l’averta ti bosć e ti pré. Empedimenc che podessa entravegnir, ajache i partezipanc rejona desferenc lengac, i vegnarà passé via de gra a ativitèdes de grop e jeghes, col didament di acompagnadores de mère lenga talièna e todescia. L program, defat, l tol ite de curta scontrèdes ti desferenc lengac, estra che ativitèdes tel temp ledech, desche nodèr o jièr a bala sgol.
La proponeta la vegnarà portèda dant en mèrtesc ai 14 de firé te Casa Moggioli, senta informativa del Euregio a Trent, en ocajion de la seconda scontrèda de chesta sajon di Mèrtesc del Euregio. La scontrèda, averta a duta la jent che à enteres, la é endrezèda da les 6 da sera te Via Grazioli, 25.
L EuregioSummerCamp l se ouc a tousc e touses del Trentin, Sudtirol e Tirol nasciui ti egn 2009, 2010 o 2011, che cognosc n second lengaz (todesch o talian); defat fora per duta la setemèna vegnarà rejonà ti doi lengac. La ativitèdes individuèles les vegnarà fates da personal de mère lenga spezialisà, estra che vegnir endrezèdes dantfora dai compagnadores. L contribut per poder tor pèrt l é de 150 euro e l tol ite assistenza, animazion, cost e cartier, che doventa 180 euro se se cogn sumèr ence l viac compagnà a jir e vegnir de outa.
L EuregioSummerCamp 2023, endrezà dal ofize comun del Euregio Tirol, Sudtirol e Trentin, co la colaborazion de Equipe Natura, l vegnarà metù a jir aldò de la regoles per la segureza Covid-19. Se fossa de besegn, i partezipanc i cognarà esser a una per fèr l test de control per l Covid-19, o moscièr l Green Pass. Se l EuregioSummerCamp 2023 l cognessa vegnir descancelà a l ultim a cajon de na emergenza sanitèra, la quota de partezipazion la vegnarà data de outa.
Per informazions: https://www.europaregion.info/it/summercamp/
Traduzion di Servijes Linguistics e Culturèi del Comun general de Fascia
(cdt)
Immagini
