Jonta e Assemblea de l’Euregio a Dispruch; n software nef per la comiscions levines

Euregio, più protezion contra la levines

[Ladino] Più segures sa mont, l é chest l obietif de la neva app Pro.Valanghe.Report per valutèr l risech de levines, che via per l invern 2026/27 la sarà a la leta per la pruma outa per duta la 346 comiscions levines de l’Euregio Tirol-Sudtirol-Trentin. L finanziament per i prumes 5 egn l é stat arsegurà da la Jonta e da l’Assemblea de l’Euregio endèna la scontrèda de en sabeda ai 26 de setember a Dispruch. Chest nef sistem ge dèsc l met a la comiscions de valutèr più sorì l risech de levines, meter ite osservazions sul post, enjignèr ju valutazions e meter en consaputa i responsaboi de la mesures racomenèdes, desche serèr la strèdes o i portoes da schi. Per l president de l’Euregio e capitan del Tirol Anton Mattle “l’Euregio stravèrda amò de più la persones e la infrastrutures sa mont: con chest strument multifunzionèl, i membres de la comiscion pel valutèr i risesc de levines a na vida amò più percacenta e portèr inant chesta gran responsabilità”.
L’Euregio se trasforma dalbon, sorafora la seides, te n “zenter de competenza per la segureza sa mont” descheche à sotrissà i presidenc de la doi Provinzies autonomes de Trent e Busan. “Semper più jent laora e va sa mont se emprevalan de strumenc digitèi, per chesta rejon volon ge dèr responetes concretes, descheche aon fat per ejempie col boletin metereologich de l’Euregio e coi strumenc per poder fèr raides più segures, sotrissea Fugatti. Per Kompatscher, “la levines les ge va do dutintorn a la medema leges de la fisica. Per chesta rejon aon pissà che sie benfat valutèr i risesc a na vida pervaliva”.
Al event à tout pèrt ence l assessor a la promozion de la cognoscenza de l’Autonomia Simone Marchiori e l president del Consei provinzièl Claudio Soini.