A la Giornèda del Tirol à tout pèrt la presidenta del CdR Tüttő, l comissèr european Brunner e i presidenc Mattle, Fugatti e Kompatscher

Euregio-Days a Alpbach, al zenter l’Europa de la regions

[Ladino] Se à serà su en domenia ai 30 de aost i Euregio-Days co la Giornèda del Tirol a Alpbach. Desche zenza, l’Euregio Tirol Sudtirol-Trentin endreza chesta giornèdes de reflescion e de scontrèda anter politica, scienza, economia, cultura e atenzion envers la neva generazions, en colaborazion col Forum European de Alpbach (EFA). Per la pruma outa chest an i cater dis de l’Euregio i se à leà, dal pont de veduda temporal e ti contegnui, al zenter del Forum, che en ocajion de la defilèda tradizionèla del Euregio-Summit l à abù desche argoment prinzipèl l mot di Euregio-Days: “Regions fortes. Europa forta. Ensema!”.
Per l president del Euregio e capitan del Tirol Anton Mattle, “una Europa forta no la nasc demò a Bruxelles, ma soraldut olache la persones, da soules o dessema, les met dant soluzions sora la seides fora. Noscia Euregio desmostra ogne dì coche la forza dal post se trasforme te capazità de azion europeèna. Per chesta rejon cognon risièr e ge dèr più forza a la Regions”.
L president Fugatti l à recordà che da sacotenc de egn l tol pèrt a la Giornèda del Tirol e al Forum de Alpbach: “L é semper zeche da emparèr da noscia comunanza de storia, de cultura e de tradizion – l à sotrissà – Ence se anchecondì fajon pèrt de n Stat desferent, saon tant che l é emportant aer na storia valiva e l é n aspet che no volon e no podon desmentièr. Descheche l é stat recordà anché, Euregio raprejentea n model e n ideèl de convivenza e de amicizia anter popui, no demò per nos enstesc ma per duta l’Europa. Saon de cogner seghitèr a lurèr sot l inom de chest ideèl”.