Traduzione in cimbro
Etnografesche musee, offe dar auzschraibung zo schütza di prodjèkte vorz djar 2025
Gerosa: “Di etnografesche Musee soin a kulturàl raiche vor in Trentino”
[Cimbro] Da provintziàl Djunta hatt ågenump atz 11 von höbiat pittnan provedimént vorgelekk vodar asesören vor di kultùr Francesca Gerosa in auzschraibung zo geba an schütz atz spetzifege prodjèkte gemacht von etnografeschen musee darkhennt vodar autonome Provìntz vo Tria, vor ditza haür soinda khent untargelekk in gåntzan 240.000 euro.
“Di prodjèkte mochan håm azpe zil di sèlln sachandarn boda servìrn zo darhalta un zo geba vèrt dar kultùr von lentar, in folk traditziongen, un in da gelaichege zait in zungen un in gebizza. Pensarbar, baispil, bia ’z khemmenda vürgevüart di beldar un di etzan von lentar, bia di laüt nemmen toal in sèlln beldar odar etzan boda soin vodar gåntzan kamòuschaft, in schatz von fölk boda innhaltet rituèln un musìk. Untarlengse auzohalta dise musee billz soin gemuant gloam ünsarn stòrdja, böllnse haltn lente, zoa azta ’z gedenkh nèt gea vorlórt” – asó hatta khött di asesören Gerosa.
Di vorsch bartn khemmen geschètzt un azma hatt rècht zuargètt in schütz, dòpo azta dar auzschraib, iz khent geschikht vor da auz soin di 30 tang sidar azzar iz khent ågenump, in Åmt vor di kultùr, von diridjént von Åmt vor di kultùr sèlbart. Aniaglaz bart vången azpe akonto auz pan djar 2025 in 50% von sèll boda iz khent zuargètt un daz sèll boda hintarsteat bart khemmen auzgezalt ’z djar 2026 balda bartn khemmen inngètt alle di rèchnung von sèll boda iz khent getånt.
In auzschraib mangda nemmen toal di etnografesche musee darkhennt vodar Provìntz: haüt soinda 89 etnografesche musee inngeschribet in roatordnung ågenump vodar provintziàl Vüarom.
Dar formulàr innzogeba di vorsch mage khemmen abegenump vodar istitutzionàl websait www.provincia.tn.it di tang boda khemmen.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
