Giovedì, 28 Novembre 2024 - 09:44 Comunicato 3333

Traduzione in mòcheno
En Trentin keart de presidenz van Arge Alp, de leistn organisiar ont regiaraktn

[Mòcheno] As de 25 van schanmikeal de autonome Provinz va Trea’t hòt ogabèckslt der Canton Ticino ont hòt kriak de presidenz van Arge Alp, u’stellt za paroatn, organisiarn ont noschaung en de istituzionaln òrbetn va de òrbetgamoa’schòft van Alpine regionen finz en de ònder bècksl as keart en Land Vorarlberg as bart kemmen gamòcht bail der 56^ Zòmmtrèff van Stòtt Viarer ka Trea’t en de leistn ta van schanmikeal 2025.
Gèltsgott en de mosnemm u’ganommen as de 22 van òlderhaileng no a vourtschbinn van president Maurizio Fugatti, de provinzal Junta hòt derklort a toal òrbetn as barn kemmen envire trong bail en doi jor va presidenz ont asou miasn vergreasern der tema “Jungen ont pèrng: projektn va lem, va òrbet, va bèrkn. Lem van jungen as stea’ en de pèrglander”.
"Bail de doin zaitn de alpineplatz sai’ bolten gabèckslt, ver de sai’ lòntschòft ont ver de lait as semm lem aa, ver dòs ber belln gilt gem en de projektn gamòcht van lait as lem as de pèrngplatz, aa bavai sèll as de jungen lem meing kemmen an mittl ver za kemmen praucht va òndra glaicheltrige aa", hòt er tsòk der Fugatti. Der hòt unterstraicht as de zòmmòrbet van Trentin as hòrta naiaòrbetn as glaich sai’ ver de regionen van Arge Alp, bart gem an paitrog ver a guata aussicht ver za regiarn de lòntschòft.
Panorama invernale di Palù del Fersina / Palai en Bersntol [ Archivio Istituto culturale mòcheno / Bersntoler Kulturinstitut]

Sait en 1972 de autonome Provinz va Trea’t mòcht toal van Arge Alp, de Òrbetgamoa’schòft van Alpine regionen, pet en rif za stitzn de neat as enteressiarn de gamoa’n van mearere regionen van alpine platz abia benn as men hilft se zbischn de nòchpern turch a rèchta zòmmòrbet. En doi moment nemmen toal en Arge Alp de Lander Vorarlberg, der Tirol ont Sòlzburg (Osteraich); de Vraistòtt va Baiern (Taitschlònt); de autonome Provinzn va Trea’t ont va Poazn ont de Region Lombardia (Balschlònt); de Kantonen van Grigioni, San Gallen ont van Ticino (Schbaiz). Abia as tschrim ist asn Statut va de Gamoa’schòft, de toalnemmer van Arge Alp tea’se obècksln de presidenz òll jor, no der alfabetische ordnungn.

Pet de ausrot u’ganommen as de zboaontzboa’sk van òlderhaileng de Junta, derzua za hom u’tsòk de trentinische presidenz, hòt derstellt der Dinst ver de sprochminderhaitn ont ausbendegen netzn za organisiarn de amministrativn ont zeil aktn bail en doi jor; der glaiche Dinst bart miasn, paroatn, organisiarn ont no stea’ en de trèffn van omt va de presidenz, van Zòmmtrèff van Stòtt Viarer, van regiar Komitat, van Grupp van òllgamoa’ netzn, van Gruppn van projekt, van Prais Arge Alp 2025 ont nou va òndra istituzionaln òrbetn as barn se hòltn vour en schanmikeal 2025.

Ver en sèll as keart de nochrichtn, de mosnemm derstellt der vourstea’ner van Druck omt va de Provinz za no schaung en Plan van nochrichtn as kearn bail en doi jor va de presidenz, turch a zòmmòrbet van Grupp van òllgamoa’ netzn van Arge Alp.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol

(cdt)


Immagini