De vourstea’ner va de regiar va ARGE ALP, en riven va de konferenz hom untertschrim zboa risoluzionen. De earste no sèll as ist kemmen tscherlt va de presidenz van Canton Ticino 2023/2024, s hòt keart en de sèlber regiar van bòsser, burzelement ver za derhòltn en de long zait s lem va de alpn birtschòft. Der tèckst unterstraicht s bichte za envire trong s kennenschòft ont sèll as men tuat zbischn de region van alpn ont de noat za vourtrong naia ideen. En an moment zoagt van bècksln van klima, der zil as men hòt ver lonka zaitn ist vinnen virm ver za meing prauchen praktesch ver za gem de moglechkait en de lander en a noat za meing pahenn tea’.
De zboate risoluzion aa klòfft van klima: der tema ist as de zòmmòrbet ver benn as hòt noat no de schlèchtn bètter oder en naturaln aukeareta passiarn. De risoluzion schauk za vinnen de zòmm strategi ver za nidern s riskiarn en de lander van alpn ont schaun za zòmm mithelven as schelltn kemmen praucht a toal aupassn za tea’.
Der Zòmmtrèff van Stòtt Viarer van ARGE ALP hòt aa u’ganommen abia as de tschbinnts iber de Strategi macroregional ver de alpine region (EUSALP) va de europeische Union. S ist kemmen unterstraicht de noat za versterchern de bichtekait va de politische Strategi: ver dòs de ARGE ALP regionen belln as schellt kemmen u’gaheift a politische zòmmklòff ver za leing se oa’ne ver bos za trong envire en de zukunft.
Zan leistn van Zòmmtrèff van Stòtt Viarer, hòt se s vaiern van praisasugem van Premi ARGE ALP 2024 gahòlten: de internazionalschatzgruppe hòt 19 projektn tschatzt as pet en aushòltlegregiar van bòsser za tea’ hom, ont s hom drai lait gabungen.
Der earste prais ist en de Scuola Specializzata Superiore di Tecnica (SSST) va Bellinzona gòngen, ver en projekt va vèrrregiar van bòsserausgem en de prinn; der zboate prais ist gòngen en de lombard Gargano ADV, ver en projekt “AquaGuardi – Der Digitaldrauschauer van Bòsser”; der dritte prais ist gòngen en de Südtiroler Bauernbund, ver en projekt "Wasser Pilot – Verpesser van bassern en de bisnbirtschòft, pauerbirtschòft, fruchtbirtschòft ont bai’merbirtschòft".
Arge Alp ist an òrbetgamoa’schòft aupaut af de 12 van schanmikeal 1972 en Mösern, en Tirol, pet en rif za òrbetn no ont unterstitzn de neat va òlla ont as enteressiart ungefer 26 milionen va lait. S nemmen toal en Arge Alp, Taitschlont pet en Freistaat Bayern, Osterraich pet de Länder Vorarlberg, Tirol ont Salzburg, Balschlont pet de Autonome Provinzn va Poazn ont Trea’t ont de Region Lombardia, de Schbaiz pet de Kantonen Graubünden, St. Gallen ont Tessin.
Letratdinst ont pilder kuriart van Druckomt
Download van pilder ont vrogn do
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
