L é stat aproà l nef pian de azion per l raion de la Èlpes 2035. Focus dintorinvia mobilità, transizion energetica e economia zircolèra
EUSALP, endrezà a Dispruch l Forum anuèl a diesc egn da canche l é stat metù su la Strategia Macroregionèla Alpina
Traduzione in ladino
[Ladino] L é passa diesc egn che i set Paijes de la Èlpes, e avisa Austria, Franzia, Germania, Tèlia, Liechtenstein, Slovenia e Svizra, colaborea tel ambit de la strategia de la UE per la region alpina (EUSALP). En mèrtesc ai 25 de november chest cedean l é stat zelebrà fora a Dispruch, olache l é stat definì ence la strategia per i diesc egn che vegn. N argoment che l é stat tratà endèna l forum anuèl EUSALP, n moment fondamentèl del an de presidenza de l’Austria e del Liechtenstein che l é do a ruèr a piz. A chest event à tout pèrt l assessor a la politiches per la cèsa, patrimonie, demanie e promozion de la cognoscenza de l’Autonomia Simone Marchiori.
“EUSALP” à desmostrà che la Èlpes no l é n confin, ma na lèrga olache i teritories colaborea per troèr soluzions adum. L Trentin, enceben che sie n teritorie no tant gran, l à dezidù jà timpruma de esser na pèrt ativa de chest percors, metan a la leta competenzes, bona prateghes e na gran atenzion envers i joegn. La cooperazion sora la seides ne à portà a esser n interlocutor fidà e propositif, che sporc sie contribut per l svilup de la macroregion de la Èlpes. Ge vardon ai diesc egn che vegn con responsaboltà e fiduzia, co la consaputa che ence n teritorie sci picol pel sporjer n gran contribut per la crescimonia de la comunanza de la Èlpes. La gran endesfida che se metarà dant EUSALP sarà chela de smaorèr amò sie peis politich a na moda da portèr dant a na vida più concreta soluzions e condizions per proèr a venjer endesfides fondamentèles desche l mudament climatich, la emigrazion, i coleamenc e i trasporc, l gust per i teritories alpins”, à sotrissà l assessor endèna sie salut, nominan la scomenzadives EUSALP metudes a jir dal Trentin del 2025, anter cheles la prejenza de n grop de joegn per lurèr fora la oportunitèdes profescionèles coleèdes al tem “foreste e filiera dei materiali legnosi” e l pest EUSALP “Quello che mi tiene qui” tel ambit del Trento Film Festival.
“Sion chi che stravèrda la Èlpes e raprejenton passa 80 milions de persones che vegn da 48 regions. Nosc obietif l é chel de arsegurèr la vita, l’economia e l’agricoltura su la Èlpes”, à dit l capitan del Tirol Anton Mattle. Mattle, canche se à serà su la riunion de lurier, ensema col sotsecretèr de Stat Sepp Schellhorn, col vize capo del goern Sabine Monauni (Prinzipat del Liechtenstein) e col Minister de Stat Eric Beißwenger (Canzelaria de Stat bavareis) à portà dant la situazion e l iter da envièr via per i egn che vegn col nef pian de azion EUSALP.
Con chest se vel arjonjer a na colaborazion amò più strenta te setores de basa desche la mobilità, la transizion energetica e l’economia zircolèra. N auter pont dassen emportant de la presidenza EUSALP 2025 l é stat chel del smaorament de la partezipazion di joegn. Passa 500 vijitadores en dut, anter chisc presciapech 200 studenc, à tout pèrt al program de compagnament del forum anuèl. Anché l consei di Joegn, metù adum da 28 joegn che vegn ca dai teritories de la Èlpes, fèsc pèrt en dut e per dut de la strutures EUSALP.
Col forum anuèl vegn fat ence l mudament de presidenza de EUSALP. L minister bavareis Eric Beißwenger à ciapà la “Kolo Wheel” na reproduzion de la roda con ergo più veia (5.200 egn), che raprejentea l moviment e la cooperazion de la region de la Èlpes.
Traduzion di Servijes Linguistics e Culturèi del Comun general de Fascia
(cdt)
Immagini
