Ågenump dar aktziong plån vor da alpinar Redjong 2035. Fokus aftz mobilitét, enerdjètege übargång un zirkolàr bichtschaft
EUSALP, atz Innsbruck dar djarege Forum atz zen djar sidar azta iz khent augelekk da Makroredjonàl Alpinar Stratedjì
Traduzione in cimbro
[Cimbro] Sidar zen djar di simm Alpinàr Lentar Österraich, Fråntscha, Beleschlånt, Liechtenstein, Slovenjia un Svaitz arbatn pittnåndar nå dar Stratedjì vodar EU vor da alpinar redjong (EUSALP). An erta atz 25 von bintmånat atz Innsbruck izta khent gevairt dar denkhtage, un izta khent detzidart di stratedjì vor di zen djar boda khemmen, aftz ditza izta sa gest khent draugeredet auz pan djarege forum EUSALP, a gruntega tappa von djar vodar österraichege un Liechtensteinare vorsitzung.
In Trèff hatta genump toal dar asesór vor di politike vorz haus, schatz un demånio un zo macha khennen di Autonomì Simone Marchiori.
“EUSALP hattaz gezoaget ke di Alpm soin nèt a konfì, ma a raum boma mage stian alle, boda di lentar arbatn pittnåndar zo venna solutziongen boda mang gian guat vor alle. Dar Trentino, siånka azzar iz khlumma, hatt zornìrt sin von earst momént unatarzolegase vor ditza, leganteda soine kompeténtzan, soine pezzarne pratike un soi nåstian in djungen. Disa groaz arbat gemacht pittnåndar übar di grentzan hattaz zuargètt z’soina hoachgeschètzt un guat zo helva vürzovüara da alpinar makroredjong. Bar schaung pitt fiducia zuar in zen djar boda khemmen, bizzante ke siånka azpar soin khlumma mabar allz ummaz gem a groaza hånt zo macha krescharn da alpinar kamòuschaft. Daz sèll boda mocht gelången EUSALP iz håm a gröazarna sbere politika zoa zo magase untarleng in konkrèt zo venna naüge solutziongen vor daz sèll bodaz paitet azpe dar klima bèkslom, ’z gelearase von lentar vo pèrge, di beng, un di traspòrte, di atrativitét von alpinar lentar” asó hatta khött dar asesór in soin gruaz, gedenkhante di initziatìvan vo EUSALP boda soin khent gemacht in Trentino auz pan djar 2025, zbisnen disan dar khnopf djunge boda håm någesüacht afte oportunitét arbat gepuntet pinn tèma “beldar un sachandarn pitt holtz” un dar Prais EUSALP “Daz sèll bodame haltet da” drinn in Trento Film Festival.
“Bar soin di sèlln boda schützan in alpinar raum un soin vortretar vo 80 mildjü laüt boda gehöarn atz 48 redjongen.
Ünsarz zil iz daz sèll zo sichra lem, bichtschaft, låntbichtschaft in alpinar raum”, hatta khött dar hauplåntsmånn von Tiról Anton Mattle. Verte dar trèff, dar Mattle pittnåndar pinn Statt untarsekretardjo Sepp Schellhorn, pinn vitze kapo von governo Sabine Monauni (Printzipàtt von Liechtenstein) un pinn Statt ministér Eric Beißwenger (bairesche Statt kantzlerai) hatt gezoaget baz un benn ’z bartnda khemmen gemacht di sachandarn in di djar boda khemmen pinn naüge aktziong plån EUSALP. Dar plån schupft zo haba no a stercharna mittarbat in stratègesche sektör azpe di mobilitét, da enerdjètege übargång un dar zirkolàr bichtschaft. An åndadar hauppunkt vodar vorsitzarung EUSALP 2025 iz machan nemmen hèrta mearar toal in djungen in sèll boda khint getånt. In gåntzan 500 laüt un zbisnen disan 200 studjént håm genump toal in progråmm zo riva aftn djarege forum. Haüt dar Rat von djungen, gemacht vo 28 djunge boda zuarkhemmen von alpinar lentar iz in gåntzan toal von struktùrn EUSALP. Dar djarege forum vallt pittnåndar pittar bèkslom vodar vorsitzarung vo EUSALP. Dar bairesche minister Eric Beißwenger hatt genump in “Kolo Wheel” a riprodutziong vodar eltarstn rodl pittar schill vodar bèlt, simbol vodar alpinar kooperatziong.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
