In Prais Arge Alp 2025 mangda nemmen toal feroine boda arbatn in di lentar vo pergè odar auz ar abege, boda schützan di untarnemmung von djungen in di lentar vort bait von stattn azpe: firme un start-up boda vürvüarn naüge un oridjinàl prodjèkte, augelekk übarhaup vor di djungen, nützante naturàl matardjeldar boma vennt in lånt sèlbart; schualn boda håm studjént untar di viartza djar boda vürvüarn prodjèkte zo nütza ’z geplèttra sa genützt un åndre naturàl matardjéldar boma vennt garade in lånt. Dar prodjèkt mocht sa soin ågeheft, ma nonet verte.
Ma mage nèt inngem prodjèkte boda sa soin geschützt garade pitt européan schütz.
Zbisnen in prodjèkte inngètt bartnda khemmen an earstn zornìrt di finalìstn vo aniaglana redjong, dena di redjongen sèlbart bartn vürtrang di prodjèkte inar internatzionàl djurì. Disa bart zornìrn di pestn sèks prodjèkte (drai vor aniaglana kategorì) boda bartn khemmen darkhennt inar zerimonie bodase bart haltn di Konferéntz von Schaffar von Governo vo Arge Alp, di Konferentz bartze haltn ka Tria atz 23 un 24 von bimmat 2025. Dar internatzionàl darkhenn vor aniaglana kategorì bart soin vo 2.500 euro vor in earst prais, 1.500 euro vor in zboate un 1.000 euro vor in draite.
Dar auzschraibung un dar formular innzoschraibase venntmen afte websait: https://www.argealp.org/it
Arge Alp in an arbat kamòuschaft augelekk atz 12 von bimmat von djar 1972 atz Mösern, in Tiról, pinn zil z’arbata übar tème boda ågian alln un boda innvånk schiar 26 mildjü laüt. ’Z nemmnda toal in Arge Alp, ’z Taütschlånt pinn Frai Stato vodar Baviara, ’z Österraich pinn Länder Vorarlberg, Tiról un Saltzburg, ’z Beleschlånt pinn zboa autonome Provintzan vo Poatzan un Tria un pittar Redjong Lombardia, di Svaitz pinn Kantöü Graubünden, Saknt Gallen un Tessin.
Übarsetzt von Schaltarle vor di zung von Toalkamou vodar Zimbar Hoachebene
