Vo est vort mkma khearn zo leba da olimpische stòrdja von Lentar von Euregio in Euregio Infopoint vo
Innsbruck: da didjitàl auzlegom sidar bintsche iz khent auzgebetart pittnar naüng sektziong boda ågeat disan lestn Olimpischen spiln o. Di auzlegom iz khent offegetånt atz 3 von hornung pasàrt, un hatta genump toal dar tirólar vitzevorsitzar Wohlgemuth pittnåndar pinn kuratór Christian Rainer, pinn Matthias Egger (kamòu Arkif vo Innsbruck), pinn profesör vodar Universitét vo Innsbruck Kurt Scharr un Wolfgang Meixner un pinn djeneràl sekretardjo von Euregio Matthias Fink.
In da naüge sektziong makma seng bazta iz vürkhent in di Olipimschen spiln von 1964 un 1976 bodase soin gehaltet atz Innsbruck un kontàrt allz daz schümma, un laidar zèrte vert daz letz o, von atlètn un atlèten von Tiról, Südtiról un Trentino partirante vo balda soin ågeheft di Olimpischen spiln sin in ta’ vo haüt. In di månat boda khemmen bartnda khemmen no zuagelekk åndre sachandar boda ågian disan lestn Olimpischen spiln 2026 o, ’z bartnda khemmen gezoaget di gare vo biathlon atz Rasen-Antholz un di nòrdischen disziplìn in Fiemme Tal, dise plètz von Euregio est mangse hoazan olimpische setz.
In dise Olimpischen spiln håmda genump toal in gåntzan 124 atlètn von Euregio, vo disan 41 von Tiról, 47 von Südtiról un 36 von Trentino. Di atlète un atlèten von Südtiról håm gebunnt in fra alle 15 madadje, nå khemmenda di sèlln von von Trentino un von Tiról pitt 14 madadje; 11 madadje håmse gebunnt di baibar un 18 di månnen.
Ma mage nèt konfrontàrn un zeln garade di madadje von Euregio pinn sèlln vodar ufitzièll såmmelung: aftna sait dar Euregio mage roatn an pòdio vor aniaglana gara asó azpe in da ufitzièll såmmelung. Ma mocht però haltn kunt ke in di gare in squadra un in di staffette, di atlètn von Euregio håm gebunnt pittnåndar pitt åndre vodar belesan un österraichege federatziong.
In soi roatom dar Euregio hatt gezelt a madadja vor mentsch. In di gare a squadre un in staffetta dar Euregio gebinnt asó mearare madadje azta daz mindarste zboa soine atletn soin gånt aftn podio.
Da gekhluppet di madadje un di kampiü
Übarsetzt von Schaltarle vor di zung von Toalkamou vodar Zimbar Hoachebene
