Martedì, 17 Dicembre 2024 - 22:46 Comunicato 3577

Traduzione in mòcheno
De noatbaiterhilf kimmp gabèckslt

Zbischn de naiekaitn barts kemmen gabèckslt de offetzait van sitzn, men bart miasn u’riaven der 1161117

[Mòcheno] S bart bider kemmen organisiart, van earste to van jor as kimmp, der dinst va noatbaiterhilf. En vraita as de 13 van schantònderer de Provinzaljunta, no a vourtschbinn van assessor en de tsunthait ont sozial politik Mario Tonina, hòt gem de nain adrèssn ont schicht en de Provinzalbèrk ver de tsunthait dinstn za stelln vour an òrbetplan vour as rift s mu’net van genner 2025. Mearer de naiekaitn drinn galeick, as no en integrativ provinzal Zòmmpint van deckter va de iberòll medizin untertschrim en leiste prochet no gea’, ver za schaung za mòchen der dinst mear laicht ont as no geat en de neat van lait, asou za prauchen zan peistn de mittln ont verpessern der sistem.
“De doi vernaier van dinst va noatbaiterhilf derstellt an bichtegen tritt ver za mèssn de tsunthaitopfer  no en de borege neat van lait - derklort der assessor Tonina -. Drinn leing naia virm ver za meing lai telefoniarn en  numer 116117 ont bider sechen de offetnòchtstunnen, versichert an glaichmessege ont strukturiarte dinst, s gip omport en an praktesche vurm en de vrogn van lait. En de glaiche zait, ist bichte as der tsunthaitsistem hòltet vour a rèchta glaichekait zbischn hèlven ont zuazoln se. Pet de doi naiekait, tea ber vernaiern de inser òrbet keing a tsunthait glaim en de lait ont paroatet za vergreasern se pet sei ont asou gem omport en de insern tsunthait òrbeter asn tema va sicherkait”, rift der provinzal assessor.
Ambulatorio medico

Drau schaung en de òrbetn as sai’ kemmen gatu’ en de sitzn va noatbaiterhilf hòt galòck sechen an nèt glaichen prauch van dinst van lait bail de mearer stunnen: en de leiste zait oarganommen, de secks mu’netn van earste to van genner 2024 finz as de draisk van prochet 2024, de lait as zua gòngen sai’ va mittanòcht finz um òchta en de vria sai’ gaben der 12% van gònze to. De mearestn lait as zuagòngen sai’ bail de nòcht hom lai noat gahòt za mòchen vrog as de hattn gameicht mòchen ver telefon nèt za mòchen se untersuach kan dockter oder hoa’m. De doin prozentn mòchen sechen de noat za bider organisiarn der dinst ver za gem pessera omportn en de bircklege neat van lait.

De bichtestn naiekaitn hòlten drinn:

  • meing prauchen der dinst lai turch der numer 116117;
  • gem en de operativ Zentral 116117 van docktern va earste hilf as òrbetn za stunnen (ex deckter va dockterbòch), pet an ausòndra u’lear an òrbet ver za iberschaung de neat; de doin deckter barn meing omport gem turch der telefon ont, benns noat ist, gea’ en haus oder mòchen semm gea’ de deckter van lònt (en sitz zoagt va de tsunthaitbèrk oder bail de hoa’mriaf);
  • vernaiern de nòchtstunnen: bail de stunnen va mittanòcht finz um òchta en de vria der dinst bart kemmen versichert van deckter va de operativ Zentral 116117 pet an omport turch der telefonont, benns noat ist, gea’ en haus oder mòchen semm gea’ de deckter van lònt; s plaim glaich der dinst bail de òndern stunnen bail der to, bail de offetzait van sitzn miast men òlbe vouraus telefoniarn en numer 116117, va um òchta zobens finz mittanòcht bail de boch, va um òchta en de vria finz mittanòcht der sòmsta, der sunta ont de vaierta va um zeichena en de vria finz mittanòcht de ta vour de vaierta.

 
Vour de oa’nadraisk van genner 2025, de provinzalbèrk ver de tsunthait dinstn bart vourstellt an tea’plan as bart kemmen vourgaleik ver za gem s derlab va de iberòll regiar van tsunthait Dipartiment. S bart kemmen gamòcht an informativ reklam ver za lòng bissn en de lait de nain virm ver za prauchen der dinst.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol

(cdt)

Fonte: Ufficio Stampa

Versione Stampabile

Immagini

Visualizza

Potrebbero interessarti: