Der President Fugatti, bail as der hòt se padònkt pet en Pirgermoaster ont de vil lait as sai’ gaben, der hòt derstellt as de trèffn va de Provinzaljunta asn ourt sai’ bichte ver “za versterchern s klòffen ont s zòmmòrbetn pet de lokaln gamoa’schòftn”. “S doi tol - ist er envire gòngen der Fugatti - ist ònderst avai s ist stòrch s hearn se a zòmmgahenk gamoa’schòft, an bichtegen bèrt as nèt òlbe vinnt men; s ist an ourt as vour de Provinz ist zòmmgahenk, ont dòs ist za loum, avai asou ist desterer de òrbet as de zòmmtemen ont hilft za lòng bòcksn de gònze gamoa’schòft. An òndern bichtegen punkt ver en doi tol ist der tema van sprochminderhaitn, as derstelln a raichekait ont a bichtega ausònderkait”. Asn doi der president hòt gadenkt de leiste pasuach, van leistn va schanmikeal, semm hòt men klòfft prope van Projekt Derver van PNRR. “Palai en Bersntol, ont s Bersntol - hòt er derklort der president - ist kemmen tschèrlt, nèt lai asou, ver en doi bichte projekt, u’gahenk en Stòttplan ver za vongen bider u’ ont hòltn hert, as hòt vour naia òrbetn ver za derhòltn s bersntolerisch, gilt gem en de lòntschòft, bider bèrt gem en de pahalter ont en de storische òltderver ver za meing sa verzinsn, verpessern de nètzn va zòmmpint, schupfn der turismus ont der nochhòltegverpesser. An verpesserplan as hòt der zil za mòchen bider lem a dorf runt bichte ver de inser Autonomi, propre ver de sai’na ausònerkaitn” hòt er garift za song der president Fugatti.
Der pirgermoaster Moar hòt unterstraicht abia as der doi to derstellt “an bichtegen moment ver de inser gamoa’schòft, a sche’na aussicht ver de gamoa’ ont ver en tol. A goltega moglechkait ver za gem bèrt en inser lònt, en de sai’na tròchtn ont en de ausònderkaint, ver za lòng sechen biavle as lebet sai’ de burtzn as tea’nens u’hengen ont abia stòrch as s ist de inser identitet. An hèrzlechen padonk en òlla de sèlln as hom gem de moglechkait za mòchen der doi trèff: en de lait as do sai’ za nemmen u’ de Junta, en de u’stelltn va de Gamoa’, en de vraischòftn van lònt, en de sèlln as hom organisiart ont en ber as òll to mòcht bòcksn ont unterstitzt s inser tol ont de inser identitet”.
Nimm oar der video va de u’nemm https://shorturl.at/KYfN1
Nimm oar der service video pet de vrong https://shorturl.at/9ecVo
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
