Soinante gest kartza vil di vorsch inngètt zo nemma toal hattma gemocht spèrrn di zait innzoschraibase vil pellar baz atz 15 von bimmat azpe da iz gest khent auzgemacht in an earstarna zait. Di nümmar gem zuar in groaz interese bodada iz ume disa initziatìf: dar prodjèkt geat å 30 schualn un in gåntzan bartnda khemmen gemacht 47 trèff. Ditza bill soin gemuant ke ’z bartnda khemmen inngevånk 72 klasse un schiar 1.200 studjént auz pa disan schualdjar. ’Z bartnda khemmen inngenump mearare khindar, diarnen un puam von untarschualn sin afte obarschualn (Gymnasien, tèknesche un profesionàl schualn).
Da didaktìk vorlegom von prodjèkt, boda khint gètt åna zo mocha zaln von laüt von GECT Euregio, iz khent vornaügart un opfart ettlane interaktìf labör. Di intervente haltn inn zboa-drai urn schual un leng vür debatte, arbatn gemacht pittnåndar, spiln online zo vorstiana biavl di studjént håm augenump von sèll boden iz khent khött. Di klasse khemmen auzgetolt in khnöpf zo macha labör boda ågian mearare argoméntn azpe “In viazo zo khenna in Euregio – bo bar soin, vo bo bar khemmen”, “di khennkart von Euregio -ber saibar”, un no “baz pintetaz un baz, anvétze nimpaz auz – åndarst ma alz ummaz gelaich!”. Darzuar khemmenda o auzgeredet spetzifege tème azpe “da mittarbat übar di grentzan – baz bar tüan un ombrómm?” zoang baispil vo prodjèkte Euregio, di zungen un di mindarhaitn, un dar workshop vo Project Management Euregio.
Asó tüanante, di schüalar un di studjént gevüart vo laüt ekspèrte un von soin maistre un profesör, mang lirnen åna ångst di stòrdja boda pintet di drai lentar un bia ’z izta khent augelekk dar European Khnopf vor da lånt kooperatziong Euregio Tiról-Südtiról-Trentino vor da pürgar edukatziong un pürgarschaft.
Übarsetzt von Schaltarle vor di zung von Toalkamou vodar Zimbar Hoachebene
