Traduzione in cimbro
Da 39tzane Konferéntz von Zungmindarhaitn durchgevüart von asesór Marchiori
[Cimbro] ’Z iztase gehaltet in mòrgas von 20 von Bintmånat in da Trentino Saal, in Palatz vo Dante Platz da 39^ Konferéntz von Zungmindarhaitn, durchgevüart von provintziàl asesór vor di politike vorz haus, schatz, demanio un zo macha khennen di autonomì, Simone Marchiori, pittnåndar pittar diridjénten von Dianst vor di Zungmindarhaitn un auzantn sachandarn Elisabetta Sovilla. Kolegàrt vo baitom soinda gest dar redjonàl asesór Luca Guglielmi un ettlane vortretar von kamöüschaftn von stòregen zungmindarhaitn ladinar, möknar un zimbar, zbisnen disan soinda gest vüarar von lentar, toalnemmar von fervaltungsrat von kulturinstitütt un vodar Autoritét vor di Zungmindarhaitn.
Dar Marchiori hatt khött vorgèllzgott alln in sèlln bodada soin gest vor di arbat gemacht zo schütza un vürzovüara di zungmindarhaitn un hatt gedenkht in trèff von provintziàl Rat bodase iz gest gehaltet in tage pellar, semm er sèlbart bodar hatt geredet, geschafft von vorsitzar Fugatti, übar di rècht von zungmindarhaitn. “In groazan gåntzan disa konferéntz geat vürsnen pittar sèlln arbat” asó hatta khött dar asesór, gedenkhante bazta tüat da provintziàl Djunta vor di lentar gelebet von zungmindarhaitn boda höarn mearar baz di åndarn di groazan problème boda håm alle di lentar von pèrng.
Dena hattma ågeheft zo reda übar in argomento inngeschribet in tageordung boda ågeat in dianst zo lazza seng di österraichegen kanél Orf 1 un Orf Sport in di lentar von zungmindarhaitn un in an tage in da gåntz Provìntz, gianante zur inar pezzarung saiz azpe qualitét, saiz azpe innhalt, un ditza bart khemmen getånt in khurtza zait, rivante zo dekha o di sèlln plètz boda sin est soin gestånt auzgehakht azpe Lenzi in Bersental.
" ’Z iz an oportunitét vor da gåntz provìntz, boda mage asó höarn un provàrn zo vorstiana a zung boda khint geredet da nåmp un darzuar vor di taütschan zungmindarhaitn an okasiong zo haba progrémm in televisiong in di zung bosa se abestian: a bichtega initziatìf boda di Provìntz gloabet” hatta no kött darzuar dar Marchiori.
Di Sovilla o hatt khött ke: “’Z iz a prodjèkt boda macht machan an bichtegen tritt vürsnen zo nempra di zungen, zo macha a bèlt boda khemmen geredet mearare zungen un aftz ditza di zungmindarhaitn vodar ünsarn Provìntz soin vorånavür”. Di Sovilla hatt gedenkht ke von sèll boda iz khent vorgelekk makma seng ke ’z izta gepezzart vil da tèknesche qualitét von progrémm Orf. ’Z izta asó khent ågenump di naüng spetzifege tèknisch un dar naüge kontràtt un izta khent khött ke ma halteta auzobetra in dianst in di djar boda khemmen.
An ent von arbatn izta khent khött dar tage vodar nèchste Konferéntz boda bart khemmen gemacht in månat von hoachnach 2025, in disa Konferéntz barta khemmen inngetoalt dar provintziàl Font vor di zungmindarhaitn un di politike zo schütza un vürzovüarase.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
