L Consei di joegn Eusalp l vegn metù adum da 28 membres (cater per vigni paisc alpin) che à la encèria per un an, col met de renovament per n auter an.
Na piataforma che va sora la seides fora per l empowerment di joegn
L Consei di joegn l met a la leta na piataforma acioche i joegn i tole pèrt a duta la dezijions di orghegn Eusalp e l arsegurea che sia idees e ponc de veduda i vegne conscidré. I partezipanc i se dèsc ju tel svilup de politiches e projec a livel alpin per ge fèr front a la endesfides più de prescia. I pel portèr dant azions concretes, projec e scomenzadives, portèr dant idees ai politics di Stac e de la regions che fèsc pèrt de Eusalp e sensibilisèr su la particolaritèdes de sia regions a livel european. I joegn i se endreza e i empèra a tor pèrt a n prozes democratich, col se confrontèr con desferenzes linguistiches e culturèles. Tel medemo temp Eusalp l empèra dai joegn e l tol su neva idees da chi che vivrà l davegnir de la Èlpes.
L Consei l se bina cater o cinch outes per ogne mandat e l colaborea via per dut l an tras strumenc de comunicazion virtuèla te gropes tematics per svilupèr ativitèdes concretes. I joegn enciarié i se dèsc ju per la mobilità sostegnibola, i se coleea con autra scomenzadives de joegn, i laora su la prospetives che vegnarà te la regions alpines periferiches e i sensibilisea sul patrimonie naturèl e culturèl de la Èlpes.
La candidatures enscin ai 31 de mé del 2025
I joegn enteressé i arà temp enscin ai 31 de mé per se candidèr, tras l sit https://alpine-region.eu/alpine-youth/get-involved . L obietif del Consei di joegn l é chel de meter dant la desvalivanza che l é tel raion de la Èlpes, per chesta rejon la selezion la vegnarà fata, per arsegurèr na composizion balanzèda anter i joegn candidac di set Stac Eusalp, ic o eles, aldò de la provenienza e de l’esperienza te organisazions di joegn. I Stac e la regions Eusalp i corirà i cosć de viac per la scontrèdes e i evenc a chi che i tolarà pèrt i componenc del Consei e i sporjarà sia consulenza e didament.
L Consei di joegn l vegn finanzià dal projet Spazio Alpino Interreg “Support Eusalp”, de chel che l partner prinzipèl l é la Region Provenza-Alpi-Costa Azzurra. Tel chèder de chest projet, la Region Bourgogne-Franche-Comté la é responsabola de la ativitèdes dedichèdes ai joegn. Estra apede, tel 2025, la co-presidenza Austria/Liechtenstein de Eusalp la ge dèsc n muie de emportanza al tor ite i joegn.
Per n saer de più:
Sit del Consei di joegn de Eusalp: https://alpine-region.eu/alpine-youth
Informazioni su Eusalp: https://alpine-region.eu/
enjontà: placat
Traduzion di Servijes Linguistics e Culturèi del Comun general de Fascia
