Karl-Josef Schubert l tol l testamonech da Andreas Schatzer. L é stat portà dant l codejel Euregio per i Conseieres de comun
Consei di Comuns de l’Euregio, la presidenza la passa al Tirol
Traduzione in ladino
[Ladino] L Consei di Comuns de l’Euregio l se à binà en mercol ai 24 de setember a Busan per l'ultima outa sot la presidenza del Sudtirol, aldò del prinzip che perveit che la encèria la vegne data su a roda anter i trei raions. Te la scontrèda del Consei di Comuns de l’Euregio a Busan l é stat lità president del Consei di Comuns l president de la Sociazion di Comuns tiroleisc Karl-Josef Schubert, desche suzessor de Andreas Schatzer, che l à abù per doi egn la presidenza desche raprejentant del Consorzie di Comuns del Sudtirol. N moment emportant del event, estra che l passaje de encèria simbolich, l é stat ence la prejentazion de n picol codejel informatif de l’Euregio.
L president de l’Euregio e president de la Provinzia autonoma de Busan Arno Kompatscher l à rengrazià per l lurier de squadra metù a jir a na vida costrutiva enscin ades e l à palesà la speranza de jir inant a chesta vida ence tel davegnir: “I Comuns i à l contat più diret co la jent. Desche leam co l’Euregio del 2021 aon metù su l Consei di Comuns de l’Euregio. L nef codejel l à l obietif de renforzèr chest leam dal pont de veduda del contegnù.”
Schatzer l vèrda al lurier fat sot la presidenza del Sudtirol: “Co la brochure Euregio per i conseieres de Comun, co la dì di Comuns de l’Euregio dedichèda a la digitalisazion e a la neva colaborazions de Comun, l é stat renforzà a na vida sostegnibola l lurier di Comuns desche pilèster fondamentèl de l’Euregio”.
Te chisc doi egn che vegn per Schubert sarà fondamentèl soraldut l efet concret: “Volon meter a jir projec concrec, dal didament enscin a la rei. L pensier de l’Euregio se cognarà l veder te ogne Comun”.
Col codejel de l’Euregio per i Consees de Comun, presciapech 9.000 conseieres de Comun i ciaparà na formazion en cont de la storia, del svilup, de la strutures e de la funzions de l’Euregio Tirol-Sudtirol-Trentin. La “Guida interattiva per l'economia circolare comunale” la met dant projec zentrèi, prioritèdes e endesfides, ma ence informazions pratiches per l svilup de Comun e indicazions per entener i programes de svilup de l’Union Europeèna per i Comuns.
La brochure la vegn touta ite tel chèder di projec interegionèi sostegnui da Euregio “Fit for Cooperation” (Fit4Co) sot l coordenament del Consei di Comuns del Sudtirol, co la Sociazion di Comuns tiroleisc e l Consorzie di Comuns Trentins.
L Consei di Comun de l’Euregio l à aproà na proponeta de mudament del Statut: anché, ai 25 de setember, la Adunanza de l’Euregio la pel ge dèr l met ai Comuns ladins de Fodom, Col e Ampez, che no i fajessa pèrt del teritorie de l’Euregio, de doventèr en dut e per dut membres del Consei di Comuns de l’Euregio.
L é stat portà dant ence l projet “Legitimult – legitimate crisis governance in multilevel systems”, svilupà dal Eurac Research de Busan tel chèder del program Horizon-Europe, che l à analisà la gestion de la crisa COVID-19 te 31 democrazies europeènes, col sotrissèr che la legitimazion de la mesures la era leèda a trasparenza, coordenament, multilivel e inclujion di sentadins. La enrescida la moscia che la azions de cooperazion e partezipazion les à renforzà la fazion e l sostegn publich. L projet l à amò apede svilupà strumenc pratics e racomanazions per miorèr la governance de la crises che vegnarà, aldò de legalità, adatabilità e responsaboltà.
Fotoservije e retrac rencuré da Euregio
Traduzion di Servijes Linguistics e Culturèi del Comun general de Fascia
(cdt)
Immagini
