Schaugante drau vor mearara zait afte arbat boda machan di bachdökhtür izta azukhent ke dar dianst khint genützt von laüt in diferentege urn: in disa lest zait, di lestn sèks månat, boda gian von earst von hoachnach 2024 sin atz 30 von prachant 2024 di årüaft in di urn boda gian vo mittanacht vort sin di achte mòrgas soin gest dar 12% von gåntzan årüaf. Darzuar di mearastn laüt auz padar nacht håm lai gevorst eppaz durch telefón anvétze baz åndre hilfan boda khemmen gètt in ambulatòrdjo odar dahuam. Dise protzentualn khönaz hoatar ke ’z iztada mångl eppaz zo bèksla zo maga håm an dianst boda rispundart in mångl von laüt.
Di bichtegarstn naüng sachandarn soin:
- intritt vor alle gelaich lai årüavante in uantzege nummar 116117;
- zuargem dar operatìf Zentràl 116117 dökhtür vor da earst hilfe (ex bachdökhtür) boroatet garade vor ditza boda mochan koordinarn di hilfan; dise dökhtür mang helvan durch telefón odar azta bart soin mångl schikhan epparummaz dahuam kan krånkh odar schikhanz in ambulatòrdjo (in setz boda khütt daz sanitér Åmt odar rüavante an dokhtur dahuam);
- bèksln di orarie auz padar nacht: in di urn boda gian vo mittanacht sin di achte mòrgas dar dianst bart soin gesichart von dökhtür vodar operatìf Zentràl 116117 helvante garade durch telefón un aztada berat mångl rüavante di dökhtür dahuam zoa azza gian kan krånkh odar rüavantese in ambulatòrdjo; anvétze in di åndarn orarie steata allz gelaich azpe vorå, di ambulatòrdje bartn soin offe, hèrta årüavante pellar in nummar 116117, vo di achte abas sin mittanacht in di bèrta tage, vo di achte mòrgas sin mittancht di såntzta, di sunta un di vairta, vo di zene mòrgas sin mittanacht di tage vor in vairta.
Vor atz 31 von hoachnach 2025, daz provintziàl Åmt vor di sanitér dianst bart vorleng an plån boda bart mochan soin ågenump voda djenaràl Dirèktziong von Dipartimént vor di gesunthait. Darzuar khinta vürgelekk zo macha bizzan in laüt durch mearare struméntn dise naüge bichtege sachandarn boda ågian alln.
Übarsetzt von Schaltarle vor di zung von Toalkamou vodar Zimbar Hoachebene
