Chi che pel fèr domana
L assegn l é resservà a la families che stèsc te la provinzia de Trent te cheles che nasc o vegn adotà n terz fì. La mère cogn aer i requisic de zitadinanza e residenza pervedui da la normativa provinzièla e la cogn fèr pèrt nel medemo nucleo anagrafich di fies.
Anter i requisic vegn pervedù ence che la mère l’abie n lurier canche la compra o tel moment de l’adozion, opuramenter che l’abie paà ite contribuc previdenzièi per amancol 12 meisc, ence no a do a do, ti ultimes cinch egn.
La desposizion la é valevola dant de sia publicazion, per i nascimenc e la adozions dal 1m de jené del 2026.
Quota fissa e quota premie
La suma la muda conforma la situazion economica de la familia calcolèda aldò del ICEF Familia:
enscin 48.000 euro en dut (400 euro al meis) per families con ICEF fin a 0,40;
enscin 30.000 euro en dut (250 euro al meis) per families con ICEF più aut che 0,40 e fin a 0,70;
per families con ICEF più aut che 0,70 o zenza ICEF la suma massimala perveduda la é semper de 30.000 euro, donca 250 euro al meis, da sotmeter al IRPEF.
L assegn l vegn dat fora a scomenzèr dal meis do del nasciment o de l’adozion scin canche l bez l compesc diesc egn.
Coi trei egn del bez vegn pervedù na quota premie de 200 euro al meis, per la mères che va endò o resta a lurèr, tout ite ence cheles che se met per sie cont. Per poder se emprevaler del didament ge vel desmostrèr de aer lurà amancol 180 dis (ence no do a do) via per l an dant da la domana.
Co portèr dant la domana
Do dai mudamenc aproé da la Jonta provinzièla con provediment dai 25 de mé, la domana, tant chela quota fissa che chela premie, la per esser portèda dant da la mère tras autenticazion con SPID o con Chèrta d’Identità Eletronica (CIE), opuramenter tras i ofizies de patronat che l é sul teritorie provinzièl. L termin per portèr dant la domana l é stat smaorà a 180 dis dal nasciment o da l’adozion del fì. Per chest an vèl la desposizions transitories per l 2026: per i bec nasciui o adoté dant dai 30 de jugn del 2026 la domana per la quota fissa la pel vegnir fata dant dai 31 de dezember del 2026, e vegn paà fora duc i meisc passé.
Per de autra informazions vardèr fora la piata: Assegno di natalità per il terzo figlio
Traduzion di Servijes Linguistics e Culturèi del Comun general de Fascia
