Traduzione in ladino

Arge Alp, a Varese l prum event sportif del 2025

[Ladino] Dai 14 ai 16 de mèrz che vegn, l’Acinque Ice Arena de Varese la ge dajarà alberch al prum di nef apuntamenc de una de la manifestazions più spetèdes e de nonzech del mond sportif da mont: i Jeghes Arge Alp 2025, n event che zelebrea la colaborazion sora la seides fora de diesc regions de la Comunità de lurier, leèdes dal voler portèr dant l sport, la sostegnibilità e la cultura da mont.
I Jeghes Arge Alp i tol ite atlec che vegn da desvaliva nazions per garejèr te la disciplines sportives tepiches de la Èlpes. L sport, de fat, l raprejentea n strument emportant per renforzèr i leames anter raions e popui.
I atlec del bal sui feres i metarà dant performance che binarà ensema eleganza, tecnica e pascion. Chest an per l’ocajion se endesfidarà presciapech 200 joegn atlec che vegn da duc i raions de Arge Alp, anter de chisc ence na ventina che raprejentarà l Trentin te la desvaliva categories di joegn, selezioné dal comitat local de la Federazion Talièna Sport de la Giacia: Juniores Under 19, Joegn Under 16, Under 14 e Under 12, che vegn da duta la sozietèdes Circolo Pattinatori Artistici Trento, Pinzolo, Fiemme On Ice, Rendena, Val di Fassa, Artistico Fiemme.
La manifestazion la vegnarà orida doman, vender ai 14 de mèrz, co la defilèda di atlec e bandieres e la vegnarà serèda su en domenia ai 16 de mèrz co la zerimonia de premiazion di atlec de la desvaliva categories e a la squadra de raprejentanza venjidora.