An darkhenn vor djunge fraiböllege, organisatziongen un vor prodjèkte übar di grentzan

An darkhenn vor djunge fraiböllege 2026, di kandidatùrn soin offe sin atz 27 von hornung

[Cimbro] An prais übar di grentze vor di pestn djungen fraiböllege: vorz djar 2026 o, dar Trentino, dar Südtiról un dar Tiról tüan offe di kandidatùrn vor in “Darkhenn vor djunge fraiböllege - Glanzleistung di pestn sachandarn”, pittnan euroredjonàl vèrt. Dar darkhenn iz vor djunge boda håm gemacht gåntz garècht un vor mearara zait, fraiböllege arbatn vor di kamöüschaftn.
Zbisnen in kandidatùrn boda bartn zuarrivan bartnda khemmen zornìrt, vünf individuèll aktivitet un åndre zboa prodjèkte gemacht vo khnöpf. Berda åvorst mocht gehöarn atz feroine odar organisatziongen boda arbatn åna zo gebinna un boda håm soin setz in di provìntz vo Tria. Di arbatn mochan eppaz håm getrakk guatz in di lentar von Trentino. ’Z barta o khemmen darkhennt a prodjèkt boda iz khent gemacht übar di grentzan, boda innvånk feroine odar organisatziongen von drai Lentar vodar Euroredjong. Di kandidatùrn mochan khemmen inngètt vor an vraita atz 27 von hornung 2026.
“Bar gloam azta disa okasiong saibe a bichtega oportunitét zo geba vèrt in djungen fraiböllegen un alln in sèlln arbatn, åna gebinn, boda khemmen vürgevüart in Trentino un boda meritàrn z’soina darkhennt azpe ’z hatt z’soina. Zornìrn z’arbata fraiböllege in ünsarne lentar iz eppaz boda khint abegètt vo djeneratziong in djeneratziong un iz toal von schatz vo alln ünsarn laüt” asó hatta khött dar vorsitzar vodar autonome Provìntz vo Tria, Maurizio Fugatti.