
Bail de trentinische presidenz barts kemmen òcht gem en tschernen de pèrng platz abia plòtz bou za gea’ za lem ont òrbetn: “Junga ont pèrg: projektn va lem, va òrbet ont va bèrk. Paispil ver za hòltn hèrt”, pet en doi politische tema bill men gilt gem en de projektn va ber as tscherlt za lem en de pèrng platz, ont asou mòcht bider lem a lòntschòft.
Der Prais Arge Alp 2025, as bart kemmen augatu’ en langes, bart kearn en de jungen as de pèrng, ver za gem stimm ont mòchen kennen de lait as òll to lem de doin platz. “Ber barn mear òcht gem en de pèrng platz ont en de mittln as mear praucht meing kemmen ver za sai’ an plòtz offet ont as envire schauk, asou za gem naia moglechkaitn”, hòt se tsòk de Gerosa.
Derno va de politische derklor va de regiarung auslònt van bolf, u’ganommen va Arge Alp en 2022, ist augòngen an projekt ver za untersuachen va abia as der tuat se vermearern en de Alpn ont bos as der nutzt en de pèrglòntschòft ont en de boa, ver dos kemmen auganommen ont taust de datn auslònt. Abia tsòk va de vicepresident Gerosa bail de 55a Zòmmtrèff van van Stòtt Viarer va Airolo, en de Schbaiz, as de 25 van schanmikeal, de autonome Provinz va Trea’t tuat voutschbinnen za baitern de òcht as mearer schòrtn van vlaischvrèsser (derzua en bolf, der per ont de billkòtz). S doi bart meing kemmen gatu’, a gèltsgott en baitern de derklor van 2022, ver za meing untersuachen ont baitern en òndra sektorn, abia de praich za kemmen nèt tschont ont bos za tea’. Men bart meing u’vòngen van an technische bischòft zòmmtrèff asn tema, pet vour sèll as men schoa’ kennt, va de entitet van vurm za derhòltn ont noschaung en de pern as lem as de inser lòntschòft.
De istituzionaln derstelltn as gaben sai’ asn zòmmtrèff hom u’ganommen ont unterstitz bos as ist kemmen vourtschbinnt van Trentin. “Ber sai’ noch za sechen de jungen as kearn um en de platz van noni gèltsgott en de nain netzn va komunikazion ont en de nain moglechkaitn va òrbet za meing tea’ vèrr pet de teleòrbet. Ber sai’ vroa’ van vourtshbinnen van attivitetn van Trentin ver en 2025 as gea’ envire pet de òrbet as ist kemmen gatu’ en de lestn zboa jarder van Cantoni San Gallo ont Ticino va de Schbaiz” hòt kein Coduri.
“Ber sai’ oa’ne pet de de bichtestn dinger za tea’ as sai’ kemmen kein hait ont ber unterstitzn de vourtschbinn as de groasn vlaischvrèsser avai der doi tema ist bichte ver òlla de regionen van Arge Alp” hòt kein Wallner.
Age Alp ist an òrbetgamoa’schòft augòngen as de 12 van schanmikeal 1972 ka Mösern en Tirol, pet en zil za vournemmen ont unterstitzn de òllgamoa’ nutzn as enteressiarn ungefèr 25 milionen va lait. S nemmen toal en Arge Alp s Taitschlònt pet en Vrai Stòtt va de Baviera, s Osterraicht pet de Länder Vorarlberg, der Tirol ont Sòlzburg, s Balschlònt pet de autonome Provinzn va Poazn ont Trea’t ont de Region Lombardia, de Schbaiz pet de Cantoni Grigioni, San Gallen ont Ticino.
Letratndinst ont pilder notschauk van Druckomt
Download pilder ont vrong do
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol