“Schützan di zungmindarhaitn iz ummaz von sèlln sachandarn boda gem an vèrt ünsarn Autonomì un iz a konkrètegar vèrt vor ünsarne kamöüschaftn. Rettn a zung billz soin gemuant zuarhaltn an kulturàl un identitét schatz, ma in da gelaichege zait zo tüanaz mochtma auleng di konditziongen zoa azze mage khemm gelebet un abegètt in naüng djeneratziongen. Gian z’sega bazta tüan di åndarn gitt zuar zo khenna struméntn un guate pratike, übarleng afte arbat sa gemacht un legen vür bazmen impaitet vo naügez in di djar boda khemmen vor ünsarne kamöüschaftn”, asó hatta khött dar provintziàl asesór vürzovüara un zo macha khennen di Autonomì Simone Marchiori.
'Z bartnda soin di vortretar von Serbski institut/ Sorbisches Institut boda bartn machan khennen pezzar di esperientz vodar sorbesche zungmindarhait boda lebet in Taütschlånt. ’Z barta khemmen geredet o von prodjèkte un von metode zo macha lem di zung un übar dar linguistìk plånung, darzuar bartnda o khemmen gezoaget di stratedjìan zo macha krescharn di ekonomì un zo kheara zo vüara laüt zo leba afte pèrng in di lentar auz ar a bege. ’Z iz an okasiong zo konfrontarase pitt åndre lentar un zo darkhenna bazta magat gian guat vor di ladinar, möknar un zimbarn von Trentino o.
Dar trèff iz augelekk von Dianst vor di zungmindarhaitn un auzantn sachandarn vodar autonome Provìntz vo Tria pittnåndar pinn asesoràt vürzovüara un zo macha khennen di Autonomì. Dar tagung steat drinn in kalandardjo von initzitìvan vor in gedenkhtage von 80° akòrd De Gasperi - Gruber un iz an okasiong zo khenna pezzar di öffentleschen politike zo schütza un auzohalta di zung kamöüschaftn nå in printzipie un in struméntn von provintziàl Gesetz.
In tagung barta nemmen tola dar redjonàl asesór zo schütza un auzohalta di zungmindarhaitn Luca Guglielmi.
Bazta khint khött in tagung bart soin garade übarsetzt von belesch aftz taütsch. Ma mage nemmen toal frai, ’z iz genumma innschraimse durch e-mail aftz: serv.minlinguistiche-relesterne@provincia.tn.it schraibante nåm un zuarnåm un azma gehöart in an Åmt.
Mearar makma vennen afte websait von tagung
Da gekhluppet dar progråmm von mòrgas
Übarsetzt von Schaltarle vor di zung von Toalkamou vodar Zimbar Hoachebene
