Dar provedimént boda ågeat bia auzotoala in provintziàl Font vor di Zungmindarhaitn gitt zuar 462.306,79 euro vor hilfan auzohalta di informatziong in di zung von zungmindarhaitn. An toal von Font vo 68.530,45 euro, anvétze, khint genützt vor initziativan boda håm an groazan vèrt vor di schützung von fölk von zungmindarhaitn, initziativan boda soin khent zornìrt vodar provintziàl Djunta un vorgelekk vo lånt vüarom, provintziàln kulturinstitütt, lånt emtar un åndre öffentleschen vüarom. Vor di arbat vürgetrakk von Comun General de Fascia vor da linguistìk plånung zo schütza un zo geba vèrt dar ladinar zung, un vor da kulturàl arbat soinda khent untargelekk 175.680 euro, anvétze a toal vo 20.000 euro soin khent zuargètt garade in emtar vodar Provìntz vor arbatn vürgevüart sèlbart.
Di initziativan finantziart un di schützt zuargètt vorz djar 2025, anvétze, soin mearare un soin khent vorgelekk von schualn un von möknar un zimbar Kulturinstitütt, baispil dar prodjèkt"Summer club 2025" boda hatt ’z zil zo nütza da möknar zung in da untarschual, odar no dar prodjèkt "Schualpuach diario scolastico 2025-2026", boda innhaltet sprüch in di zimbarzung, pildar, khurtze stördjela boda zoang bazzez iz ’z lem vodar zimbar kamòuschaft. “Workshop plurilingui/Spilhu’ en Bersntol”, iz an åndadar prodjèkt boden iz khent zuargètt dar schütz, ditza iz an labor in da möknar zung vor schiar 120 studjént boda håm zbisnen in 13 un in 18 djar, gegruntet aftnan tisch spil boda innhaltet an bege au pan Bersental. ’Z zil von prodjèkt “Lånltich, Zung un Kultur” iz daz sèll zo halta lente di zimbarzung in di schualn vodar Hoachebene auz baz in da untarschual vo Lavròu boda di zimbarzung khint sa gelirnt. In disan prodjèkt bartma ren vo bia ma hatt gelebet, bele traditziongen ’z soinda, vo bo ’z khemmenda her di zuarnem un di låntnem vodar gåntzan Hoachebene.
Dar progråmm vor di informatziong in di zung von zungmindarhaitn vorz djar 2025 vorlekk, azpe ma hatt sa khött, auzohalta un zo schütza initziativan vor di komunikatziong in di zungen von zungmindarhaitn un in da gelaichege zait darkhennt berdase macht o. Zbisnen disan initziativan soinda: daz mindarste zbuantzekh saitn vo “Liaba Lait” aftnan fòldjo vodar provìntz gemacht von Bersntoler Kulturinstitut; un sovl in di zimbarzung “Di Sait vo Lusérn” vürgetrakk von Kulturinstitut Lusérn; dar möknar teledjornàl “Sim to en Bersntol” aftna televisiong vodar provìntz hèrta vürgetrakk von Bersntoler Kulturinstitut; un dar teledjornàl “Zimbar Earde” aftna televisiong vodar provìntz un atz TVA Vicenza un “Dar Foldjo” poade gemacht von Kulturinstitut Lusérn; di kürs vor di zimbarzung boma vennt afte plattform “Zimbar Mediatèk” hèrta von Kulturinsitut Lusèrn.
Vor da ladinar kamòuschaft, anvétze, darzuar in trasmisiongen boda gian in televisiong gemacht in soi muatarzung un di djornél gemacht von Comun General de Fascia, soinda di trasmisiongen afte radio un in schütz zuargètt in boch djornàl “La Usc di Ladins”, gemacht vodar feroine “Union Generèla di Ladins dla Dolomites”.
Übarsetzt von Schaltarle vor di zung von Toalkamou vodar Zimbar Hoachebene
