En Bersntol de doi sidlung hòt u’pfònkt en earste toal van 1200 en Garait ont en Oachlait ont ist derno envir gòngen en Vlarotz ont en Palai, bo as se se garift hòt en de earst jorzeichener van 1300.
De heff sai’ autoalt kemmen zbischn de si’, en de tochtern lai benn as koa’ priader gahòp hòt. Der doi sistem van autoaln de pahalter, as kemmen ist van òltn romane ont as praucht kemmen ist en gònze Trentin, hòt trong za tea’ eppas ver za hom nèt za vil autoalt de grinter en kloa’na stickler, iberhaup benn as der numer van lait sting ist. Eppas as tu’ kemmen ist, zan mindestn van 1700 envir, ist gaben s sèll za suachen òndra òrbetn, abia zan paispil de sèll van krumer oder ver a zait de sèll van knòppn. Asou, pet a ker gèlt as as saitn galeikt kemmen ist, ist s meglech gaben za kaven òndra grinter oder za tea’ auspaun oder vergreasern de paun as noat gaben sai’ za trong envir de normaletn òrbetn van pauern.
Pet en gèlt gabungen as en hòndl der pauer van Filzerhof as de leistn van 1700 hòt gameicht auspaun ont vergreasern s haus ont kaven ondrà gruntsticker derzua en hoff. En u’vòng van 1900 der Filzerhof hòt gahòp acker, bisn ont a stuck bòlt ver zirka 20 hektar.
Der nomitto bart envirgea’ pet pasuachen innbende en hoff, tradizionaleta musik pet de Palaear Learmusikantn ont a marenn.
Der gònze trèff ist offet en òlla ont umansist.
