Van Trentin hom toalganòmmen de derstelltn van bersntoler ont zimbrischen gamoaschòftn
Zòmmtrèff en Robaan van taitschn sprochgamoa’schòftn
[Mòcheno] En sunta, en Robaan, oa’n van zentren va der zimbrische gamoa'schòft van hoaeim va Asiago, hòt se gahòltn de jorzòmmriaf van Komitat van taitschn- historischen- sprochinseln en Balschlònt.
Der Komitat, as augòngen ist en 2002, klaup zua innrichtn ont vraischòftn as kemmen van 17 taitscha sprochinseln van gònzn balscha Alpn, van Aostatol ont van Friuli Venezia Giulia.
De gamoaschòftn tea’n en runt glaichen, runt interessantet sai’ de aspèktn va der sproch.
De sprochen as kemmen hait nou klòfft sai’ an risultat va jarder va bècksl ont kontaktn pet òndra sprochen, dòs mòcht sa sai’ oa’zege. De doing sprochen toaln se aus en zboa groasa familie: de seng as kemmen van pairisch as de vinnen se en Friuli Venezia Giulia, en Veneto, en Trentin ont de sèll alemanna as lep en Piemonte ont en Aostatol. Der jortrèff ist abia òlbe an schea’n moment za konfrontarn se as de probleme as òlla de doing sprochgamoa’schòft hom, gor men de lem vèrr oa’na va der ònder ont pet gasetzn ont situazionen as kinnen bècklsn.
Der Komitat karaterizart se ver za schaung aus ont envirtrong de sprochpolitikn ont, mear as òlls, tròk envir zòmmòrbetn ver òlla as mòchen kennen en de lait aspèktn van schrochgamoa’n, aspèkt as dòra kònnt men verglaichen. Zbischn de òrbetn zòmmenprink as en doi’ vurm, ist de realizazion va der nai sait internet ont an druck as klòffen tuat van lem ont na’men de lòntschòft ont de platz as de hoachen pèrng van an iader gamoa’schòft.
Drinn en Komitat, abia as der Statut paschraip, kennen sai’ gor de gamoa’instituzionen ont de vraischòftn as nèt sai’ schprochminerhaitn ober belln de glaichen dinger as bill der Komitat ont òrbetn zòmmen ver de glaichen ziln. Ver dòs en Robaan ist guat kemmen ganòmmen de vrog va der gamoa’ va Terragnolo za nemmen toal en Komitat, s ist kemmen darkennt de òrbet as de Gamoa’ gatun hòt za trong envir de zimbrische kultur.
(lt)
Immagini
