Dar vorsitzar hatt ågeheft zo reda von earst toal von Laaz, boda iz khent gelekk a gara da vorgånnate boch. Dar earst tòkko vodar arbat S-136 “Auzpezzarn un betarn in provintziàl bege von Laaz (8.583.500 euro arbatn,
darzuar pitt åndre 3.226.100 azta beratn impreviste un vor åndarz) lekk vür zo richta khurtze tòkkn boda soin drå nidarzorütscha un zo betra drai khearn boda soin perikolosat, un zo macha a galeria boma mage gian lai in nidarbart vo 255 mètre, anvétze di zboa stòregen stöll bartn khemmen gehaltet asó azpe sa soin un mang khemmen gemacht lai in aubart.
Dena dar zboate toal bart ågian zöbrest, sèmm boda dar Laaz rift atn bege SS 349 afte Hoachebene vo Lusérn boda bart khemmen gemacht an umkhear.
Ma paitet, anvétze, ke auz pan djar (gara auz pan 2026) saibda dar esekutìf prodjèkt vor di arbatn S-984 – arbatn zo pezzra un zo sichra in bege SS 350 vo Folgrait atz Besenèll (4.924.292,54 euro).
Ma bart pezzarn da earst galeria dòpo Dietrobeseno un dena an naüng bypass zoa maga garedegarn da malamentar khear lai auz von stoll.
’Z barta khemmen zo khosta 6.113.430,30 euro di arbat n. S-1024 “Richtn un betarn in bege SS 349 zbisnen Pian dei Pradi un di galeria Fricca” Disa arbat iz drå zo khemma prodjèktart. ’Z zil iz daz sèll zo betra in gåntz bege un vortzonemma a drai khearn zoa azma mage viazarn destrar un mearar sichar aftz disan bege boda pintet di Hoachebene pittar hoachebene vodar Vigolåna, pittar Valsugåna un pitt Tria.
Antånto gianda vürsnen di arbatn zo sichra, zuar in pèrge, in bege SS 350 vo Folgrait zuar in Astetal (arbat n. S-1057, vor 366.000 euro) boda atz 12 von hornung von 2024 izta gest abekhent dar kròtz.
Antånto geatma vürsnen zo studjara di arbat n. S-1079 - machan an umkhear aftn bege SS 350 atz Ekken vo Folgrait (1.000.000,00 euro) – ’z zil iz sicharn in bege pittnar umkhear boda zuargitt zo pasara zovuaz un gelaüchteget azmada sege garècht – un no di arbat n. S-1050 zo macha an vuaz bege atz Gasperi zoa azta di laüt mang gian sichar aftn bege SS 349 atz Lavròu (1.298.715,10 euro).
Vor bazta ågeat, anvétze, ziviln arbatn saitma drå nidazolega in tèknesche ekonòmesche prodjèkt z’sega biz iz möglich herrichtn ’z khirle vodar Madonna Pelegrina aft Sommo djoch (50.000 euro).
Übarsetzt von Schaltarle vor di zung von Toalkamou vodar Zimbar Hoachebene
