A kart vor berda hatt daz mindarste 65 djar drau pitt 3600 euro zo khoava sachandar vor di earstn nöat in geschèft un spetziarie konventzionàrt
’Z khinta auz da Silbar Kart Trentino
Traduzione in cimbro
[Cimbro] ’Z soinda drau 3.600 euro zo zala geplèttra vor di earstn nöat vor laüt boda håm 65 djar odar mearar un håm sa zuargètt in toal A von Provintziàl Uantze Schèk. ’Z iz da Silbar Kart Trentino ågenump an vraita atz 19 von kristmånat vodar provitziàl Djunta un boda iz khent gezoaget von vitzevorsitzar Spinelli boda hatt vürgelekk di delibera vürzovüara in prodjèkt. " 'Z iz a sperimentàl maz boda geat zo legase darzuar in åndarn initziativan augelekk vodar provintziàl Djunta zo helva in famildje un in pürgar, übarhaup di sèlln boda gebinnen bintsche un håm nèt genumma gèlt zo giana vür un ristscharn asó z’soina auzgehakht vo allz – dise di börtar von vitzevorsitzar – in dise lestn djar ’z lem iz khent hèrta taürar un di laüt soin nemear guat nåzostianada. Asó pitt disan prodjèkt saibar guat zo geba eppaz darzuar in sèlln boda sa håm in Provintziàl Uantze Schèk, zoa azza mang khoavan geplèttra vor di earstn nöat”.
Asó khinta zuargètt, una tantum drau aftn toal A, a hilfe vor di sèlln famildje boda sa håm in Provintziàl Uantze Schèk – toal A un boda håm garadege rècht zo habanen.
Dar schütz khint darkhennt in an uantzegen toal in gåntzan vor 3.600,00 euro boda mage khemmen genützt von sèll bodasan håm rècht odar von soin delegate durch da Silbar Kart Trentino zo khoava geplèttra in di geschèft odar in di spetziarie konventzionàrt.
Di Provìntz in di bochan boda khemmen bart gian z’sega bele geschèft un spetziarie böllnse konventzionàrn un dena bartze åhevan auzzogeba di kart in sèlln bodasan håm rècht, boda asó mang gian in di provintziàln Schaltarla boda soin in di lentar zo nemmase.
Intervista in vitzevorsitzar Spinelli
Di pildar
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
