Vorz djar 2025 soinda khentvürgelekk zboa zaitn innzogeba di vorsch: von 19 von madjo sin atz 30 von prachant un dena von 8 von herbestmånat sin atz 23 von bimmat. Di vorsch mang khemmen inngètt lai on line durch di “Khåmmar von pürgar” – pittnåndar pitt alln in biravan boda soin mångl – aftz disan indiritzo: https://www.provincia.tn.it/Servizi/Contributo-per-immobili-privati-rivitalizzazione-aree-rischio-abbandono.
Vor disan prodjèkt soinda khent untargelekk in gåntzan zen mildjü euro (vünve vorz djar 2025 un vünve vorz djar 2026). Zo helva in pürgar auzvülln di formularn vor in vorsch un zo macha bizzan allz baztada iz mångl zo nemma toal in auzschraib izta khent augelekk an informatìf schaltarle durch telefón durchgevüart von Åmt vor di urbanistìk bodase vinnt in bege Malta 67 ka Tria. ’Z schaltarle iz offe von menta aftn vraita vo di noüne sin di zbölve mòrgas dar nummar iz dar 0461 492712.
Darzuar izta an indiritzo vo eltronische post lai vor ditza: recuperocentristorici@provincia.tn.it.
Ber makda inngem in vorsch
Dar vorsch mage khemmen inngètt lai vo laüt (nèt firme odar feroine) boda sa håm odar boda vor da auz soin sèks månat bartn håm a haus dar soinen in ummaz von 32 lentar interesàrt. Aniaglaz mentsch mage vången schütz daz mearaste vor drai quartìarn. Dar zbing iz azta almånko ummadar von quartìarn saibe daz haup haus drinnzolebeda sèlbart odar zo vorzisa pittnan bolvln zis.
’Z haus mocht khemmen gelebet odar vorzist daz mindarste vor zen djar.
Dar schütz mage dekhan an toal von sèll boda khint gezert zo khoava ’z haus, ditza lai az nèt soin vraütn von earst grado zo vorkhoava, un mage nèt khemmen genützt gåntz lai zo khoava. Berda hatt mearar baz 45 djar un bill nützan in quartìaro azpe haup haus mocht nèt håm soin vonsitz in kamòu boda iz ’z haus von tage 6 von snitt 2024.
Schütz vürgelekk
- auzzorichta: sin aftn 40%von sèll boda khint gezert in di storesche zentrum un in 35% afte åndarn saitn, sin atz 80.000 euro (aftnan khost daz mearaste vo 200.000 euro, daz mindarste vo 10.000 euro).
- zo khoava: 20% von khost von gåntz haus sin 100.000 euro von sèll boda khint gezert.
Bazta khint geschützt
- Innante (daz mearaste 125.000 euro): soléttn, maurn, seraméntn, bazzar, haitzug (auz baz fotovoltaische zelle) liacht, innate stiang lai vor in quartìaro.
- Auzante (aftaz gåntz haus odar aftaz sèll boma sek): tach, maurn, sachandarn pittnan groazan vèrt, stiang, pontesöln, zöü.
- Tèknisch: sin aftn 10% von sèll boma zert vor aniaglana kategorì (innante/auzante)
Pintom
Berda inngitt in vorsch mocht soin padrù von haus balz åvorst odar vorda auz soin sèks månat. ’Z haus mocht nèt gehöarn in katastaln kategorian A1, A8 odar A9 un mocht nèt håm mearar baz acht quartìarn un darzuar mochtz nèt soin toal vonan kondominio. Aniagladar schütz bart håm an kòditze CUP boda mocht khemmen geschribet aftna aniagalana rèchnung boda khint inngètt zo zoaga bazma hatt gezert. Di rèchnung mochan khemmen inngètt vorda auz soin 24 månat sidar azta iz khent zuargètt dar schütz. ’Z iz verbotet leng disan schütz darzuar åndre öffentlesche schütz zuargètt, vor di gelaichegen arbatn in di lestn zen djar.
Bia innzogeba di vorsch
Di vorsch mang khemmen inngètt åhevante von menta atz 19 von madjo afte plattform on line aftn indiritzo:https://www.provincia.tn.it/Servizi/Contributo-per-immobili-privati-rivitalizzazione-aree-rischio-abbandono
boma mage o seng allz bazta ågeat disan prodjèkt. Azta hebatn z’soina mearare laüt boda vorsan in schütz vor daz gelaichege haus odar quartìaro, bartz soin lai an uantzegez mentsch (pinn SPID odar CIE) innzogeba in vorsch.
Briavan boda soin mångl
Berda inngitt in vorsch mocht åhengen:
- Tèknesche relatziong untarschribet vonan profesionìst boda khint geschribet baz ma bart tüan;
- Vorkhost un meter rèchnung;
- Azta soin mearare åvorschar mochta soin dar mandatt vo aniagaln åvorschar vorz mentsch boda inngitt in vorsch;
- Aztada soin åndre padrü, se o bartn mochan zuargem zo macha di arbatn zo boda khemmen gemacht.
Roatordnung
Di vorsch bartn khemmen geschètzt nå in sèll boda auzmacht di delibera boma mage vennen afte websait https://www.provincia.tn.it/Servizi/Contributo-per-immobili-privati-rivitalizzazione-aree-rischio-abbandono
Di kamöündar
Dar prodjèkt gaet å disan kamöündar: Altavalle, Bleggio Superiore, Bondone, Borgo Chiese, Bresimo, Canal San Bovo, Castel Condino, Castello Tesino, Cis, Cinte Tesino, Dambel, Frassilongo, Grigno, Livo, Lusérn, Mezzano, Novella, Ospedaletto, Peio, Pieve di Bono-Prezzo, Pieve Tesino, Rabbi, Rumo, Sagron Mis, Segonzano, Sover, Terragnolo, Tre Ville (auz baz Palù vo Madonna di Campiglio, Katastàl Kamòu “Ragoli II”), Valdaone, Valfloriana, Vallarsa, Vermiglio.
Übarsetzt von Schaltarle vor di zung von Toalkamou vodar Zimbar Hoachebene
